Die maatreëls vir die toekenning van spesiale verlof vir studiedoeleindes is soos volg:

1. Spesiale verlof vir ‘n goedgekeurde studiekursus en vir ‘n tydperk wat deur die Wes-Kaap Onderwysdepartement (WKOD) goedgekeur word, mag aan ‘n permanent aangestelde opvoeder toegeken word om sy/haar kwalifikasie te verbeter. Die verlof mag met volle of gedeeltelike salaris of sonder salaris toegeken word. Die goedkeuring van hierdie verlof hang af van die aantal aansoeke wat ontvang is en of dit bekostigbaar is vir die WKOD.

2. Spesiale verlof mag op ‘n 50/50 basis toegeken word, d.w.s. waar die opvoeder gebruik maak van sy / haar opgehoopte verlofkrediete vir 50% van die verlof terwyl die WKOD 50% van die verloftydperk as spesiale verlof met volle salaris toeken. Dit sal oorweeg word vir:
2.1 ‘n opvoeder wat nie in besit is van ‘n goedgekeurde kwalifikasie nie, maar voldoen aan die ervaringvereistes vir die onderrig van spesifieke vakke, wat in die algemeen van toepassing is op tegniese vakke waar gekwalifiseerde ambagsmanne, wat gewoonlik nie gekwalifiseerde opvoeders is nie, hierdie vakke moet aanbied. Verwys na die Onderwyswet (Wet 76 van 1998), Regulasie 2 en die Personeeladministrasiemaatreëls, Hoofstuk B.
2.2 ‘n eerste-fase, aan permanent aangestelde prinsipale wat hulle bestuursvaardighede wil verbeter. Spesiale verlof vir studiedoeleindes mag aan prinsipale toegeken word wat vir ‘n goedgekeurde onderwysbestuurskursus by ‘n goedgekeurde inrigting vir ‘n periode van een (1) jaar registeer.

3. As spesiale verlof met volle of gedeeltelike salaris vir studiedoeleindes toegeken word aan opvoeders ingevolge paragraaf 2 hierbo, verwag die WKOD van die opvoeders om periodieke vorderingsverslae, ten minste een per semester, ten opsigte van sy/haar studies in te dien. Van die opvoeder word verwag om ‘n ooreenkoms met die WKOD aan te gaan ingevolge waarvan hy/sy onderneem om aan die WKOD diens te lewer onmiddellik na die voltooiing van die tydperk van spesiale verlof vir studiedoeleindes vir ‘n tydperk wat ten minste gelykstaande is aan die tydperk wat vir spesiale verlof vir studiedoeleindes met volle salaris aan hom/haar toegeken is, of vir ‘n dienstydperk proporsioneel tot die persoon se salaris gedurende die tydperk van spesiale verlof vir studiedoeleindes, soos die geval mag wees.

4. Spesiale verlof vir studiedoeleindes (d.w.s. die Departement se 50% van die verloftydperk) sal nie van die opvoeder se verlofkrediete verhaal word nie.

5. Spesiale verlof vir studiedoeleindes word toegeken aan ‘n maksimum van twee (2) onderwysers per instansie/ kantoor/ direktoraat vir enige spesifieke tydperk.

6. Aansoeke om studieverlof moet by die WKOD ingedien word teen nie later nie as 30 September van die jaar voor die aanvang van die studie. Die aansoekvorm moet vergesel word van bewyse van aansoek om toelating tot die kursus waarvoor studieverlof nodig is.

7. Bring asseblief die inhoud van hierdie omsendbrief onder die aandag van alle opvoeders in u instansie/ kantoor/ direktoraat, insluitende diegene met verlof, en laat hulle dit teken en dateer. Prinsipale moet verseker dat ‘n afskrif van hierdie omsendbrief aan die voorsitter van die skoolbeheerliggaam besorg word.

8. Dit word aanbeveel dat u afskrifte van hierdie omsendbrief en ander omsendbriewe met betrekking tot verlof, in ‘n aparte lêer / omslag vir toekomstige gebruik / naslaandoeleindes liasseer.



GETEKEN: J.H. HURTER
HOOF: ONDERWYS
DATUM: 2003:03:06