Die maatreëls rakende die toekenning van spesiale verlof vir professionele en persoonlike ontwikkeling en vir godsdienstige viering(e) is as volg:

1. Spesiale verlof met volle salaris kan aan ‘n inrigtinggebaseerde opvoeder toegestaan word.

  • om hom of haar in staat te stel om betrokke te raak in aktiwiteite wat gemik is op sy of haar persoonlike ontwikkeling,

  • om hom of haar in staat te stel om betrokke te raak in aktiwiteite wat gemik is op sy of haar persoonlike ontwikkeling, waar die persoonlike ontwikkeling in die belang van die Wes-Kaapse Onderwysdepartement (WKOD) en/of die instansie waaraan die opvoeder verbonde is, of

  • vir godsdienstige vieringe.
2. Die totale aantal verlofdae wat ingevolge paragraaf 1 hierbo toegestaan word aan ‘n inrigtinggebaseerde opvoeder mag nie 3 werksdae per jaarlikse verlofsiklus oorskry nie.

3. In die geval van aansoeke om betrokke te raak in aktiwiteite wat toegespits is op die professionele of persoonlike ontwikkeling van die opvoeder, moet die opvoeder skriftelik aandui tot watter mate die aktiwiteit sy/haar professionele ontwikkeling sal bevorder. Waar die opvoeder deur nie-regeringsorganisasies, vakbonde, ens. uitgenooi word om seminare, simposiums, werkwinkels en opleidingsessies, ens by te woon, moet die uitnodiging of ‘n kopie daarvan by die verlofvorm aangeheg word.

4. Aansoeke om verlof deur opvoeders moet by die hoof van die inrigting ingedien word vir sy/haar aanbeveling en voorlegging aan die WKOD. In gevalle waar ‘n hoof van ‘n inrigting nie die verlof aanbeveel nie, moet hy of sy die verlofaansoek met sy of haar motivering via die Kringbestuurder na die WKOD stuur.

5. Aansoek om verlof deur die hoof van die inrigting moet by die Kringbestuurder ingedien word vir aanbeveling en voorlegging aan die WKOD. In gevalle waar die Kringbestuurder nie die verlof aanbeveel nie, moet hy of sy die verlofaansoek met sy of haar motivering via die OBOS Direkteur, na die WKOD stuur.

6. Aansoeke om spesiale verlof vir bogenoemde doeleindes moet vroegtydig ingedien word. Aansoeke sal onder geen omstandighede oorweeg word, indien die verlof reeds ‘n aanvang geneem het nie. In laasgenoemde geval sal verlof sonder salaris toegestaan word om die opvoeder se afwesigheid van diens te dek.

7. Opvoeders moet daarop let dat die aansoek om verlof oorweeg sal word met inagneming van die WKOD se diensleweringsvereistes, naamlik, die behoeftes van die leerders en die inrigting.

8. Bring asseblief die inhoud van hierdie omsendbrief onder die aandag van alle opvoeders, insluitende diegene met verlof, en laat hulle dit teken en dateer. Prinsipale moet verseker dat ‘n afskrif van hierdie omsendbrief aan die voorsitter van die Skoolbeheerliggaam besorg word.

9. Dit word aanbeveel dat u afskrifte van hierdie omsendbrief en ander omsendbriewe met betrekking tot verlof in ‘n aparte lêer / omslag vir toekomstige gebruik / naslaandoeleindes liasseer.



GETEKEN: J.H. HURTER
HOOF: ONDERWYS
DATUM: 2003:03:06