Die maatreëls in verband met die toekenning en benutting van bevallings- en aannemingsverlof is as volg:

1. BEVALLINGSVERLOF
1.1 ‘n Opvoeder is geregtig op vier opeenvolgende maande (wat openbare en skoolvakansies insluit) betaalde bevallingsverlof wat ten minste 14 dae voor die verwagte geboortedatum, maar nie later nie as die werklike geboortedag in geval van ‘n premature geboorte, begin.
1.2 Bevallingsverlof is ‘n basiese reg en mag nie geweier word nie.
1.3 Aansoek om bevallingsverlof moet ten minste 3 maande voor die verwagte datum van geboorte soos deur die geneesheer aangedui, ingedien word ten einde reëlings vir ‘n plaasvervanger te tref.
1.4 Die opvoeder moet diens hervat op die ooreenstemmende dag vier (4) maande later, of byvoorbeeld indien die bevallingsverlof van 15 Junie tot 14 Oktober strek, moet die opvoeder dus diens hervat op 15 Oktober, of die eerste werksdag daarna, indien die laasgenoemde dag nie ‘n gewone werksdag is nie.
1.5 Bevallingsverlof mag soos volg verleng word:
1.5.1 die toekenning van siekteverlof as gevolg van mediese komplikasies,
1.5.2 die toekenning van tot 184 opeenvolgende (kalender) dae onbetaalde verlof; of
1.5.3 die toekenning van jaarlikse verlof / opgehoopte verlof, waar van toepassing.
1.6 ‘n Opvoeder wat ‘n miskraam of stilgeboorte het of ‘n aborsie ondergaan nadat betaalde bevallingsverlof begin het:
1.6.1 sal geregtig wees op ses (6) weke betaalde bevallingsverlof, en
1.6.2 daarna kan sy siekteverlof benut in die geval van mediese komplikasies (bv. miskraam, stilgeboorte of aborsie).
1.7 ‘n Opvoeder mag nie binne ses (6) weke na geboorte diens hervat nie, tensy die betrokke geneesheer sertifiseer dat die opvoeder geskik is om diens te hervat.
1.8 Waar dit prakties uitvoerbaar is, onderhewig aan paragraaf 1.7 hierbo, mag die Wes-Kaap Onderwysdepartement (WKOD) ‘n opvoeder toelaat om die tydperk van bevallingsverlof te onderbreek. Byvoorbeeld, as ‘n opvoeder twee (2) maande van bevallingsverlof benut het en die baba word gehospitaliseer vir ‘n tydperk van ten minste een maand, mag die tydperk van die baba se hospitalisasie omskep word in jaarlikse / opgehoopte verlof of die opvoeder kan diens hervat. Die oorblywende deel van die bevallingsverlof mag dan benut word nadat die baba uit die hospitaal ontslaan is.

2. AANNEMINGSVERLOF
2.1 ‘n Opvoeder wat ‘n kind jonger as twee jaar aanneem, kwalifiseer vir aannemingsverlof tot ‘n maksimum van 45 werksdae. Daarna sal die voorsiening van paragrawe 1.5.2 en 1.5.3 geld.
2.2 As beide ouers of lewensmaats in die diens van die Staat is (opvoeders ingesluit), sal beide gades vir aannemingsverlof kwalifiseer met dien verstande dat die verlof (vir beide gades) nie vyf-en-veertig (45) werksdae gesamentlik ooreenkomstig die bepalings in 2.1 hierbo oorskry nie. Byvoorbeeld indien een ouer / lewensmaat vyf-en-veertig (45) dae van aannemingsverlof benut, sal die ander gade / lewensmaat nie vir aannemingsverlof kwalifiseer nie. Indien die gade / lewensmaat egter twintig (20) werksdae benut, sal die ander gade / lewensmaat die oorblywende vyf-en-twintig (25) werksdae mag benut. Die verlof mag gelyktydig of afsonderlik geneem word.
2.3 Dokumentêre bewyse dat die aanneming goedgekeur en inderdaad sal plaasvind / plaasgevind het, moet tesame met die verlofvorm ingedien word.

3. ALGEMEEN
3.1 Bring asseblief die inhoud van hierdie omsendbrief onder die aandag van alle opvoeders in u instansie / kantoor / direktoraat, insluitende diegene met verlof, en laat hulle dit teken en dateer. Prinsipale moet verseker dat ‘n afskrif van hierdie omsendbrief aan die voorsitter van die Skoolbeheerliggaam besorg word.
3.2 Dit word aanbeveel dat u afskrifte van hierdie omsendbrief en ander omsendbriewe met betrekking tot verlof, in ‘n aparte lêer / omslag vir toekomstige gebruik / naslaandoeleindes liasseer.


GETEKEN: J.H. HURTER
HOOF: ONDERWYS
DATUM: 2003:03:06