A. GEWONE SIEKTEVERLOF
1. Die huidige siekteverlofsiklus het op 1 Januarie 2001 ‘n aanvang geneem. Opvoeders is geregtig op 36 werksdae siekteverlof, met volle salaris, oor ’n driejaarsiklus. Onbenutte siekteverlof verval aan die einde van elke siklus en kan nie na die volgende verlofsiklus oorgedra word nie. Die volgende siekteverlofsiklus begin op 1 Januarie 2004.
2. Opvoeders wat weens ‘n skielike siekte nie instaat is om vir diens aan te meld nie, moet die prinsipaal / toesighouer gedurende die eerste dag van siekte in kennis stel.
3. Opvoeders wat om siekteverlof vir drie of meer opeenvolgende dae aansoek doen, moet ‘n mediese sertifikaat van ‘n geregistreerde en erkende mediese praktisyn, soos gedefinieer deur die Suid-Afrikaanse Raad vir die Gesondheidsprofessie, waarin die rede vir en die tydperk van siekte aangedui word, indien. Die mediese sertifikaat moet gebaseer wees op ‘n fisiese ondersoek van die opvoeder deur die mediese praktisyn.
4. In die geval waar ‘n opvoeder versuim om aan voorafgaande bepalings te voldoen, sal die prinsipaal/toesighouer die geval hanteer aan die hand van die verdienste van die geval, wat nie die moontlikheid uitsluit om verlof sonder betaling aan te beveel nie.
5. In die geval waar die prinsipaal/toesighouer of die Wes-Kaap Onderwysdepartement (WKOD) ‘n patroon met betrekking tot die gebruik van siekteverlof identifiseer, kan die opvoeder versoek word om ‘n mediese sertifikaat in te indien ten opsigte van afwesighede weens siekte van minder as drie dae. Nieteenstaande die indiening van ‘n mediese sertifikaat, kan die WKOD op grond van verdere mediese advies, weier om verlof wat deur die mediese sertifikaat gedek word, toe te staan en die afwesigheid sal as verlof sonder salaris beskou word.
6. ‘n Opvoeder se siekteverlof sal verminder word met 1/36ste (een dag) van die siekteverlofsiklus, vir elke 15 opeenvolgende dae verlof sonder betaling geneem.
7. Indien ‘n kantoorgebaseerde opvoeder, gedurende die benutting van jaarlikseverlof met volle salaris siek word, kan die opvoeder, in so ’n geval, aansoek doen om die jaarlikseverlof in siekteverlof te omskep, in welke geval mediese sertifikaat van ‘n geregistreerde en erkende mediese praktisyn, soos gedefinieer deur die Suid-Afrikaanse Raad vir die Gesondheidsprofessie, binne dertig (30) dae ingedien moet word.
8. Indien ‘n inrigtinggebaseerde opvoeder gedurende die benutting van opgehoopte verlof (vakansieverlof) siek word, kan die opvoeder, in so ’n geval, aansoek doen om die opgehoopte verlof in siekteverlof te omskep in welke geval ‘n mediese sertifikaat van ‘n geregistreerde en erkende mediese praktisyn, soos gedefinieer deur die Suid-Afrikaanse Raad vir die Gesondheidsprofessie, binne dertig (30) dae ingedien moet word.

Die toestaan en gebruik van opgehoopte verlof sal in ‘n aparte omsendbrief gedek word.
9. Vakansieverlof sonder betaling kan nie in siekteverlof omskep word nie.

B. TYDELIKE ONGESKIKTHEIDSVERLOF
1. Addisionele siekteverlof, met volle salaris, kan aan ‘n opvoeder wat sy/haar gewone siekteverlof binne ‘n driejaarsiklus uitgeput het (by wyse van verskeie kort tydperke of een lang tydperk) toegestaan word, indien, volgens ‘n geregistreerde en erkende mediese praktisyn, die opvoeder verdere afwesigheid benodig weens tydelike ongeskiktheid, wat nie permanent van aard is nie.
2. Die toestaan van tydelike ongeskiktheidsverlof of addisionele siekteverlof is onderhewig aan die voorwaardes soos aangedui in hierdie omsendbrief (B1,3, 4 en 5). Enige aanduiding dat die opvoeder se siektetoestand permanent van aard is, moet deur die prinsipaal/toesighouer aan die WKOD vir ondersoek gerapporteer word.
3. Voordat ‘n aansoek om tydelike onbevoegdheidsverlof oorweeg kan word, moet ‘n mediese verslag van ‘n geregistreerde en erkende mediese praktisyn, soos gedefinieer deur die Suid-Afrikaanse Raad vir die Gesondheidsprofessie, ingedien word.
4. Die siektetoestand moet vooraf deur die mediese praktisyn wat die opvoeder behandel, gesertifiseer word, behalwe waar omstandighede dit nie toelaat nie. Waar dit onmoontlik vir die opvoeder is om die mediese verslag vooraf in te dien, moet die opvoeder alle pogings aanwend om dit by die vroegste geleentheid in te dien.
5. Die Hoof: Onderwys mag van die opvoeder vereis om ‘n tweede mediese opinie te verkry alvorens goedkeuring vir addisionele siekteverlof toegestaan kan word. Uitgawes in hierdie verband sal deur die Departement gedra word.
6. Die Hoof van Onderwys mag siekteverlof met volle salaris tot ‘n maksimum van 30 opeenvolgende werksdae toestaan, tydens welke tydperk ‘n ondersoek na die oorsaak en omvang van die opvoeder se ongeskiktheid gedoen moet word. Die ondersoek sal ooreenkomstig item 10(1) van Skedule 8 van die Wet Op Arbeidsverhoudinge, 1995 gedoen word.
7. Die Hoof: Onderwys kan aan die hand van mediese bewyse en op voorwaardes soos deur hom bepaal, die addisionele siekteverlof toestaan.
8. Indien ‘n opvoeder van mening is dat daar onbillik teenoor haar of hom opgetree is vir sover dit die toestaan van addisionele siekteverlof betref, het die opvoeder die reg om die grieweprosedure en die relevante dispuutresolusieprosedure te volg, ten einde die aangeleentheid op te los.

C. PERMANENTE ONGESKIKTHEID
1. Opvoeders wie se graad van ongeskiktheid deur ‘n bevoegde mediese praktisyn as permanent gesertifiseer is, kan tot ‘n maksimum van dertig (30) werksdae siekteverlof met volle salaris of sodanige addisionele aantal dae verlof soos benodig, deur die Hoof: Onderwys toegestaan word om die onderstaande prosesse af te handel.

Die opvoeder sal ‘n mediese verslag, tesame met die aanbeveling van die Prinsipaal en die Kringbestuurder, moet indien.
2. Die WKOD sal binne 30 werksdae die moontlikheid bepaal met betrekking tot

  • alternatiewe plasing / opname,

  • die aanpassing van die opvoeder se pligte of werksomstandighede.
3. ‘n Opvoeder wie se graad van ongeskiktheid as permanent gesertifiseer is, maar wat steeds diens kan doen, mag, ingevolge die toepaslike maatreëls, horisontaal met behoud van die diensvoordele herontplooi word.
4. Indien die herontplooiing lei tot die hertoewysing tot ‘n pos met ‘n laer gradering, sal die besluit vroegtydig verduidelik word en die voortgesette benutting van die opvoeder se diens as sodanig, sal met die instemming van die opvoeder geskied. Indien die opvoeder toestemming weier om in die laer pos benut te word, kan die Departement steeds sy prerogatief gebruik om die dienste van die opvoeder op grond van swak gesondheid te beëindig.
5. In die geval waar die herontplooiing van die opvoeder heropleiding behels, sal die WKOD alle bronne (tyd en finansies), haalbaarheid en potensiële voordele / uitkomste in oorweging neem alvorens die herontplooiing goedgekeur word.
6. Die herontplooiing van die opvoeder se dienste moet optimale benutting van haar / sy vaardighede verseker en dit mag nie dienslewering skaad nie.
7. Indien die WKOD of die opvoeder daarvan oortuig is dat sy/hy nie weer daartoe in staat sal wees om effektiewe diens op haar / sy vlak of rang te lewer nie, mag die opvoeder voortgaan met ‘n aansoek om op grond van swak gesondheid uit diens te tree.

D. VERLOF VIR BEROEPSBESERING EN -SIEKTES
1. Verlof vir beroepsbeserings en -siektes mag aan opvoeders toegestaan word vir die duur van die tydperk wat opvoeders nie kan diens doen nie as gevolg van beroepsbeserings of beroepsiektes.
2. Die Hoof: Onderwys kan verlof vir beroepbeserings aan ‘n opvoeder toestaan wat aan ‘n besering ly wat met die werk verband hou en deur ‘n derde party veroorsaak is, toestaan op voorwaarde dat die opvoeder:
2.1 ‘n eis om skadevergoeding teen die derde party instel.
2.2 onderneem om by ontvangs van skadevergoeding (ingevolge die Wet op Vergoeding vir Beroepsbeserings en -Siektes, 1993) sover as moontlik die WKOD te vergoed vir kostes wat die ongeluk meegebring het.
3. Die WKOD onderneem om redelike stappe te neem ten einde die opvoeder behulpsaam te wees met die instel van die eis om vergoeding, ooreenkomstig subparagraaf 2 hierbo.

E. DOKUMENTASIE

Alle aansoeke om die bogenoemde verlof moet saam met die toepaslike dokumentasie (Z1 vorm en mediese sertifikate) ingedien word.

F. ALGEMEEN
1. Bring asseblief die inhoud van hierdie omsendbrief onder die aandag van alle opvoeders by u instansie/ kantoor/ direktoraat, insluitende diegene met verlof, en laat hulle dit teken en dateer. Prinsipale moet verseker dat ‘n afskrif van hierdie omsendbrief aan die voorsitter van die Skoolbeheerliggaam besorg word.
2. Dit word aanbeveel dat u afskrifte van hierdie omsendbrief en ander omsendbriewe met betrekking tot verlof in ‘n aparte lêer / omslag vir toekomstige gebruik / naslaandoeleindes liasseer.


GETEKEN: J.H. HURTER
HOOF: ONDERWYS
DATUM: 2003:03:06