1. Die Nasionale Minister van Onderwys het op 01 Januarie 2002 nuwe verlofreëlings vir opvoeders ingestel. Die volgende voorwaardes geld ten opsigte van jaarlikse verlof:

2. ‘n Opvoeder behou alle verlofkrediete asook alle verlof wat voor 31 Desember 2001 opgehoop het wanneer hy / sy binne ‘n departement of tussen Staatsdepartemente sonder onderbreking van diens oorgeplaas word.

3. ‘n Verlofsiklus verwys na ‘n tydperk van 12 maande wat op 1 Januarie van elke jaar begin.

4. ‘n Opvoeder word nie geag met verlof te wees nie, indien hy / sy:
4.1 as ‘n getuie moet optree
4.1.1 in ‘n wangedragsaak of ‘n wangedragondersoek ingevolge die een of ander wet
4.1.2 by ‘n ondersoeksaak
4.1.3 voor ‘n kommissie of komitee van ondersoek wat deur die Staat aangestel is of voor ‘n komitee of ‘n instansie wat ingevolge ‘n wet aangestel is
4.1.4 in enige hof.
4.2 as ‘n verweerder of medeverweerder moet verskyn in ’n siviele hofsaak wat uit sy/ haar ampspligte voortspruit en waarby die Staat of enige statutêre instelling direkte belang het.
4.3 in hegtenis geneem is of voor die hof op ‘n strafregtelike aanklag moet verskyn en later vrygespreek word of die aanklag teruggetrek word,
4.4 ‘n onderrigprogram soos deur die werkgewer of professionele liggaam vereis, bywoon of daaraan deelneem of waar van hom/ haar vereis word om te registreer ten einde geregistreerd te bly en met die werkgewer se goedkeuring ‘n onderrigprogram of enige ander aktiwiteite waarby die werkgewer ‘n belang het, bywoon of daaraan deelneem.

5. DIE JAARLIKSE VERLOF WAAROP KANTOORGEBASEERDE OPVOEDERS GEREGTIG IS
5.1 Die hoofdoel van jaarlikse verlof is om rusperiodes aan ‘n kantoorgebaseerde opvoeder te voorsien maar, onderhewig aan die verlofmaatreëls vervat in Resolusie 7/2001, kan dit ook benut word om die tydperke van ander kategorieë van verlof soos in die maatreëls voorsien, te verleng.
5.2 ‘n Aansoek om jaarlikse verlof mag nie onredelik geweier word wanneer die vereistes van dienslewering in aanmerking geneem is nie.
5.3 Die verlofvoordele van ‘n kantoorgebaseerde opvoeder vir ‘n volle jaar is,
5.3.1 22 werksdae vir ‘n opvoeder met minder as 10 jaar diens;
5.3.2 26 werksdae vir ‘n opvoeder met 10 of meer jaar diens;
5.3.3 28 werksdae vir ‘n opvoeder wat voor 1 Julie 1966 aangestel is.
5.4 ‘n Opvoeder wat aangestel is na die aanvang van die jaarlikse verlofsiklus (‘n tydperk van 12 maande wat elke jaar op 1 Januarie begin) of wie se diens gedurende ‘n verlofsiklus beëindig word, sal geregtig wees op jaarlikse verlof bereken teen een-twaalfde van die volle jaar se voordele vir elke voltooide maand van diens.
5.5 Tydelike opvoeders wat vir ‘n geslote tydperk aangestel is, kom in aanmerking vir jaarlikse verlof wat proporsioneel tot die dienstermyn bereken en word volgens een twaalfde van hul volle jaarlikse voordele per maand van diens bereken.
5.6 Opvoeders wat op ‘n deeltydse of gedeelde basis aangestel is, is geregtig op jaarlikse verlof proporsioneel tot hul aanstellingsdatum.
5.7 Vir elke 15 aaneenlopende dae verlof sonder salaris, sal die opvoeder se verlofvoordele met een twaalfde verminder word.
5.8 Vir die doeleindes van die toekenning van jaarlikse verlof beteken werksdae Maandag tot Vrydag, openbare vakansies uitgesluit.
5.9 Ten minste 10 werksdae moet as verlofdae benut word gedurende die jaarlikse verlofsiklus.
5.10 Alle onbenutte verlof moet nie later nie as 6 maande na die verstryking van die relevante verlofsiklus geneem word. Daarna sal onbenutte verlofkrediete verbeur word.
5.11 Die Wes-Kaap Onderwysdepartement (WKOD) sal kantoorgebaseerde opvoeders aan die einde van elke jaarlikse verlofsiklus inlig oor die aantal beskikbare verlofdae wat hulle tot hul krediet het.
5.12 Indien ‘n kantoorgebaseerde opvoeder se aansoek om verlof geweier word en nie herskeduleer word nie as gevolg van die WKOD se diensleweringsvereistes, moet sulke verlof op versoek, ingevolge paragraaf 4.1 van Resolusie 7/2001 aan die opvoeder aan die einde van die ses maande tydperk soos gemeld in subparagraaf 5.10 hierbo, uitbetaal word.
5.13 Derhalwe word alle lynbestuurdes/toesighouers ingelig om die aansoeke om vakansieverlof van alle kantoorgebaseerde opvoeders goed te keur met deeglike inagneming van die diensleweringsvereistes van die kantoor of afdeling. Alle verlofkrediete moet binne die betrokke verlofsiklus benut word. Enige versoek om die uitbetaling van verlof moet deur die relevante Hoofdirekteur onder wie die opvoeder ressorteer, goedgekeur word en moet binne drie (3) maande voor die verstryking van die huidige verlofsiklus ingedien word.

Vir die uitvoering van hierdie instruksie en vir die behoorlike bestuur van verlof is dit van die uiterste belang om ‘n verlofrooster op te stel en te implementeer.

6. JAARLIKSE VERLOF WAT VOOR 1 JULIE 2000 OPGELOOP HET.
6.1 Opvoeders sal alle geouditeerde opgehoopte verlof van voor 1 Julie 2000 behou.
6.2 Die uitbetaling van hierdie verlofkrediete sal gemaak word in gevalle van:
6.2.1 sterfte;
6.2.2 aftrede, ingesluit vervroegde aftrede; of
6.2.3 diensbeëindiging weens swak gesondheid.
6.3 Die Hoof van Onderwys sal bepaal of daar ongeouditeerde tydperke was, in welke geval die opvoeder se verlof uitbetaal sal word op die basis van 6 dae vir elke voltooide jaar van diens tot ‘n maksimum van 100 dae in geval van die verlof periode(s) wat nie geouditeer is nie.
6.4 Die Hoof van Onderwys sal prosedures en maatreëls bepaal in ooreenstemming met diensleweringbehoeftes, rakende hoe opvoeders toegelaat word om hul verlofkrediete wat opgehoop het voor die datums waarna in paragraaf 6.1 hierbo verwys word, bo en behalwe die normale vakansievoordele te benut.

7. NOMINASIE VAN BEGUNSTIGDES, EN VERLOFUITBETALINGS
7.1 ‘n Opvoeder mag een of meer begunstigdes benoem aan wie sy of haar verlof-krediete in die geval van sterfte uitbetaal word. Die relevante vorm (WP1002) moet in die verband voltooi word.
7.2 Indien ‘n opvoeder te sterwe kom en geen begunstigde genomineer het nie, mag die verlofkrediete soos volg betaal word:
7.2.1 ten volle aan die eggenoot / lewensmaat van die afgestorwe opvoeder.
7.2.2 indien daar geen eggenoot / lewensmaat is nie, in gelyke dele vir die voordeel van minderjarige en ander kinders (ingesluit wettige aangenome kinders) van die oorledene wat ten tye van sy/ haar sterfte ten volle van die opvoeder afhanklik was; of
7.2.3 indien daar geen kinders is nie, aan die oorledene se boedel.

8. JAARLIKSE VERLOF MET VOLLE BETALING IN OORMAAT TOEGEKEN
8.1 ‘n Opvoeder mag nie aanspraak maak op jaarlikse verlof met volle betaling bo die verlof wat die opvoeder tot sy/haar krediet het nie, verlofkrediet ingevolge paragraaf 6.1 hierbo ingesluit.
8.2 Indien aan ‘n opvoeder, as gevolg van ‘n bona fide fout, jaarlikse verlof met volle salaris toegeken word bo wat hy of sy op daardie stadium tot sy/haar beskikbare krediet het, sal dit van daardie opvoeder se volgende verlofsiklus verhaal word.
8.3 Indien aan ‘n opvoeder wat uit diens tree by die Staat ‘n oormaat jaarlikse verlof met volle salaris toegeken is, gemeet aan wat die opvoeder op die laaste dag van diens tot sy of haar krediet gehad het, sal dit as ‘n oorbetaling beskou word wat teruggeëis moet word.

9. ALGEMEEN
9.1 Bring asseblief die inhoud van hierdie omsendbrief onder die aandag van alle opvoeders, insluitende diegene met verlof, en laat hulle dit teken en dateer.
9.2 Dit word aanbeveel dat u afskrifte van hierdie omsendbrief en ander omsendbriewe met betrekking tot verlof, in ‘n aparte lêer / omslag vir toekomstige gebruik / naslaandoeleindes liasseer.


GETEKEN: J.H. HURTER
HOOF: ONDERWYS
DATUM: 2003:03:06