1. Die protokol vir die organisasie, bestuur, koördinering en monitering van musiekkompetisies en/of -feeste vir openbare skole in Suid-Afrika is in Staatskennisgewing No. 21697 gepubliseer. Alle skoolmusiekkompetisies en -feeste moet op die basis van dié protokol georganiseer word. Die omvang en doelstellings van die protokol word in die genoemde Staatskennisgewing gestel.

2. Ten einde die protokol te implementeer, sal ‘n provinsiale loodskomitee gestig word om provinsiale musiekprojekte wat op die protokol gebaseer is, te organiseer en bestuur. Hierdie komitee sal bestaan uit verteenwoordigers van die onderwysersunies en erkende provinsiale musiekverenigings en belangegroepe wat musiekkompetisies en -feeste vir primêre en sekondêre skole reël.

3. Die implementering van die protokol sal deur middel van vier nasionale projekte geskied:

  1. Die jaarlikse Tirisano Skoolkooreisteddfod, wat ‘n gesamentlike projek tussen die nasionale Departement van Onderwys en Eerste Nasionale Bank is;

  2. Die jaarlikse nasionale koorfees vir primêre en sekondêre skole;

  3. Jaarlikse kompetisies en feeste vir instrumentale musiek;

  4. Navorsings- en ontwikkelingsprogramme in musiekonderrig.

4. Besonderhede van die Tirisano Skoolkooreisteddfod sal so spoedig moontlik aan skole voorsien word. Die lys van voorgeskrewe werke en die reëls van die Eisteddfod is beskikbaar op die webtuiste van die WKOD.

5. OBOS uitdunne sal gedurende April en Mei 2003 geskied. Daar word beplan om die provinsiale finale ronde vanaf 29 Mei tot 1Junie 2003 te hou. Die wenkore sal die provinsie by die nasionale kampioenskappe vanaf 10 tot 13 Julie 2003 verteenwoordig.

6. Alle skole word sterk aangemoedig om aan dié Eisteddfod deel te neem.

7. ‘n Afskrif van die protokol word ingesluit en prinsipale word versoek om die inhoud van hierdie omsendbrief en die protokol onder die aandag van alle belanghebbendes te bring.


GETEKEN: C.J. FOURIE
HOOF: ONDERWYS
DATUM: 2003:02:28

Protokol  (grootte: 34 KB)