| 1. |
Die rookbeleidsdokument van die Wes-Kaapse Provinsiale Administrasie is aangeheg. Hierdie beleid tree onmiddellik in werking en is mutatis mutandis van toepassing op Hoofkantoor, Onderwysbestuurs-en-ontwikkelingsentrums (OBOS’e) en onderwysinrigtings. |
| 2. |
Ingevolge regulasie 3 van die Wysigingswet op die Beheer van Tabakprodukte, 1999 (soos vervat in Staatskoerant R1453 van 3 Desember 1999), is kantore (oopplan ingesluit), werkkamers, konferensiekamers, toilette, gange, vergaderlokale, ruskamers, nutskamers, mediese fasiliteite, hysers, amptelike vervoer, stoorkamers, ouditoriums, enige area waartoe lede van die publiek normaalweg toegang het, areas waar rook verbode is. Die werkgewer kan egter kamers of afgeslote areas aanwys waar daar gerook mag word, onderhewig daaraan dat die kamers vensters het wat na buite oopmaak, dat hierdie vensters oop sal wees wanneer daar gerook word en dat hierdie kamers aparte ventilasiestelsels sal hê wat lug na buite sal voer. Hierdie kamers moet ook van die res van ander areas afgeskei wees deur middel van betonmure of soliede afskortings. Waar daar as gevolg van akkommodasiebeperkings geen ingerigte rookkamers beskikbaar is nie, word personeel versoek om gedurende rookpouses buite die gebou te rook. |
| 3. |
Die verantwoordelikheid om te besluit of werknemers hulle werkplekke kan verlaat om gedurende amptelike ure te rook, word hiermee ingevolge paragraaf 4.5.2 van die aangehegte beleid na hoofde van opvoedkundige inrigtings en direkteure gedelegeer. Personeel behoort egter binne die toegepaste reëls toegelaat te word om rookpouses gedurende teetye en etenstye te neem sodat amptelike diensure nie in die proses verlore gaan en produktiwiteit daaronder ly nie. Hoofde moet die nodige reëlings tref om te verseker dat die beleid uitgevoer word. Hoofde van onderwysinrigtings kan personeel toelaat om hulle rookpouses gedurende die vasgestelde pouses vir leerders of studente te neem. |
Bring asseblief die inhoud van hierdie omsendbrief onder die aandag van alle betrokkenes.
GETEKEN: JJL VIVIERS
HOOF: ONDERWYS
DATUM: 2003:03:06
|