1. Die Wes-Kaap Onderwysdepartement (WKOD) streef sedert sy totstandkoming in 1995 daarna om kwaliteitonderwys te lewer. Dit was egter nie moontlike om al die verskillende strukture en stelsels van die vier vorige onderwysdepartmente onmiddellik tot 'n eenheid saam te snoer nie en daar is dus besluit om 'n geordende bendaring te volg. 'n Belangrike oorweging in hierdie verband is om leerders in staat te stel om vir so lank as moontlik uit hulle ouerhuise skool te gaan.

2. In die WKOD se strewe na die lewering van kwaliteitonderwys, het die volgende aspekte reeds op die platteland aandag geniet:
2.1 'n Aantal kleiner skole is op ordelike wyse gesluit en die opvoeders en leerders is by ander skole geakkommodeer.
2.2 Koshuisbeurse is gestandardiseer en ingestel.
2.3 'n Ekonomiese bestuurstelsel is by al die koshuise geïmplementeer.
2.4 Sommige skole se leergang is uitgebrei om voorsiening te maak vir graad 9.

3. Daar word beoog om leerdervervoerskemas (LVS) wat leerders in landelike gebiede vanaf hul tuisdorp, waar daar wel geskikte skole is, na 'n buurdorp vervoer, uit te faseer en daarmee kunsmatige segregasie te beëindig. Fondse wat hierdeur bespaar sal word, kan elders tot groot voordeel aangewend word.

4. Aangesien dorpe se omstandighede van mekaar verskil, sal elke geval afsonderlik gehanteer word. Daar word beplan om as volg te werk te gaan:
4.1 'n Onderwysforum (bestaande uit die beheerliggaam en die skoolhoof van die betrokke skool, en die kringbestuurder wat as fasiliteerder sal optree) sal vir elke dorp gestig word.
4.2 Oorhoofse beplanning vir die voorsiening van onderwys sal saam met die onderwysforum van elke dorp gedoen word.
4.3 Waar akkommodasie beskikbaar is, sal LVS uitgefaseer word. Tydige beplanning sal gedoen word waar akkommodasie nie beskikbaar is nie.
4.4 Leerdervervoer sal oor 'n tydperk (sê 2 tot 3 jaar) uitgefaseer word.
4.5 Daar sal konsultasie met werknemerunies wees.

5. Finale besluite oor die uitfasering van LVS sal geneem word eers nadat:
5.1 alle betrokke gemeenskappe behoorlik ingelig is
5.2 openbare verhore waarheen alle belanghebbendes uitgenooi is en waar hulle insette kan lewer, gehou is
5.3 hierdie kommentaar aan die LUR vir Onderwys voorgelê is.

6. Aangesien hierdie 'n baie sensitiewe aangeleentheid is, sal die WKOD dit as sulks probeer hanteer.

Bring asseblief die inhoud van hierdie omsendbrief onder die aandag van alle belanghebbendes.



GETEKEN: RB SWARTZ
HOOF: ONDERWYS
DATUM: 2003:01:27