1. |
Die Suid-Afrikaanse Grondwet voorsien ’n raamwerk waarbinne menseregte verstaan en in ons daaglikse lewens toegepas kan word en dit is dus belangrik dat leerders ’n deeglike kennis van en insig in die Verklaring van Menseregte moet hê. |
2. |
Gedagtig hieraan, word skole versoek om ’n daadwerklike bydrae te lewer tot die beskerming van kinders en die bevordering van Menseregtedag - 21 Maart 2003. Die spesiale fokus op Menseregtedag sal leerders help om waardevolle kennis, vaardighede, waardes en gesindhede wat nodig is om ’n aktiewe rol in ons demokratiese samelewing te speel, te bekom. |
3. |
Dit is belangrik dat leerders moet verstaan dat regte ook verantwoordelikhede impliseer en dat hulle moet toesien dat die regte van ander gerespekteer word. |
4. |
Aandag aan sake rakende menseregte moet ‘n kenmerk van enige deurlopende skoolprogram wees. Die leerareas Lewensoriëntering, Kuns en Kultuur, Sosiale Wetenskappe en Taal, Geletterdheid en Kommunikasie, is veral geskik vir leerders om menseregte-aangeleenthede te ondersoek en hul menings daaromtrent te ontwikkel. Opvoeders word aangeraai om ‘n geïntegreerde benadering gebaseer op hierdie leerareas te gebruik wanneer hulle ’n program vir Menseregtedag opstel. |
5. |
Skole word aangemoedig om spesiale vergaderings, praatjies en byeenkomste te reël ter voorbereiding van die viering van Menseregtedag. Die volgende onderwerpe kan gebruik word in die beplanning van aktiwiteite:
Wat is menseregte?
Viering van diversiteit ten opsigte van geslag, godsdiens, ras, taal, ens.
Maniere om menseregte te klassifiseer
Stuiting van die misbruik van mag
Wen en verloor - regverdige spel in sport
Regte en verantwoordelikhede as verantwoordelike landsburgers
Sosiale en ekonomiese regte
|
6. |
Enkele idees vir aktiwiteite om Menseregtedag met Kurrikulum 2005 te integreer:
Maak ’n lêer met inligting oor organisasies wat ’n bydrae lewer om oplossings te bied t.o.v. die misbruik van menseregte.
Stel vraelyste op oor menseregte en relevante aangeleenthede.
Beplan aktiwiteite oor die Verklaring van Menseregte en die Kinderregtehandves.
Voer onderhoude met relevante openbare figure, persone wat in die veld van menseregte werk of mense in die gemeenskap wat bereid is om hul ervarings te deel.
Skep kunswerke of maak ’n muurskildery vir die skool waarin kinderregte en verantwoordelikhede uitgebeeld word en lewe gevier word.
Gebruik rolspel: kies ’n onderwerp oor die begrip ‘regverdige spel’ in verskillende situasies.
Maak gebruik van koerante, visuele beelde en ander media in die klaskamer gedurende die week wat op 17 Maart 2003 begin.
|
GETEKEN: P.A. VINJEVOLD
HOOF: ONDERWYS
DATUM: 2003:02:20
1 Let asseblief daarop dat Afdeling 7 van die omsendbrief aangepas is vir gebruik op die Internet
|