1. Ingevolge Staatsdiensregulasies 2001, Afdeling VIII, is alle uitvoerende beamptes verplig om ‘n nuwe personeelprestasiebestuur-en-ontwikkelingstelsel (PPBOS) te ontwikkel ten einde die huidige stelsel van prestasie-evaluering te vervang.
2. Voordat ‘n prestasiebestuur-en-ontwikkelingstelsel gebruik kan word, en om die geldigheid daarvan te verseker, moet ‘n departement die stelsel op groepe werknemers in alle beroepskategorieë toets. In oorleg met die Staatsdiensvakbonde is ‘n dwarsleggende makrobeleid vir die Wes-Kaapse Provinsiale Administrasie (WKPA) ontwikkel. Die Wes-Kaap Onderwysdepartement (WKOD) het die ingeslote prosedurehandleiding binne die perke van hierdie beleidsraamwerk ontwikkel. Om die WKOD se loodsprojek in hierdie verband te fasiliteer, is sy eiesoortige organisatoriese konteks in aanmerking geneem.
3. Die loodsprojek sal lynbestuurders en verteenwoordigers van staatsdienspersoneel verbonde aan 20% van die WKOD se opvoedkundige inrigtings, versprei oor al die OBOS’e insluit. Die feit dat die organisatoriese konteks by verskillende soorte inrigtings, soos Elsenskole, landbouskole en inrigtings met koshuise verskil, is deeglik in ag geneem. ‘n Komponent van elke direktoraat of OBOS sal ook deel uitmaak van die loodsprojek wat van 1 April 2003 tot 31 Maart 2004 sal strek.
4. Die geldigheid van die PPBOS sal tydens die loodsperiode getoets word en terugvoering en resultate sal benut word om die vorm van die finale stelsel wat vanaf 1 Junie 2004 van krag sal wees, te bepaal. Alhoewel die projek gedurende hierdie tydperk aan deurlopende hersiening onderworpe sal wees, sal enige voorstelle van partye wat nie betrokke is by die projek nie, waardeer word. Alle voorstelle/bydraes kan gestuur word aan mev. M. de Wet by mdewet@pgwc.gpv.za of mev. E. Potgieter by epotgiet@pgwc.gov.za.
5. Inligtingsessies wat inligting sal voorsien oor die toepassing van die PPBOS en die toekomstige prosesse is geskeduleer vir Maart en April 2003.
6. Verder dien dit gemeld te word dat die bestaande stelsel van prestasiebeoordeling van staatsdienspersoneel tot en met 31 Mei 2004 van krag bly.
7. Enige navrae oor die inhoud van hierdie omsendbrief kan gerig word aan die volgende:
mev. M. de Wet:           Tel. (021) 467-2474 
mev. E. Potgieter:        Tel. (021) 467-2472
8. Bring asseblief die inhoud van hierdie omsendbrief onder die aandag van alle staatdienspersoneel onder u beheer.


GETEKEN: G.J. ELLIOTT
HOOF: ONDERWYS
DATUM: 2003:02:12