| 1. |
In opvolging van Omsendbrief 0139/2003 van 18 Junie 2003 is verdere voorskrifte wat gebaseer is op `n ooreenkoms wat in die Sentrale Bedingingsraad gesluit is, van die Departement: Staatsdiens en Administrasie ontvang. Die hooftrekke van die ooreengekome wysigings is soos volg: |
| 1.1 |
|
Die vervanging van die polshorlosie as `n dertigjaar-toekenning deur `n kontanttoekenning van R3 000 met ingang van 1 April 2003 |
| 1.2 |
|
Die skrapping van die vereiste van deurlopende bevredigende diens |
| 1.3 |
|
Die jaarlikse hersiening van die bogemelde kontantbedrag ooreenkomstig die Verbruikersprysindeks |
| 2. |
Om uitvoering te gee aan SDKBR-resolusie 6/2003 en die bepalings vervat in `n brief gedateer 22 September 2003 van die Departement: Staasdiens en Administrasie, sal die volgende oorgangsmaatreëls geld: |
| 2.1 |
|
`n Werknemer/opvoeder wat voor of op 31 Maart 2003 30 jaar aaneenlopende diens voltooi het, en ingevolge Deel XXVIII van SDKBR-resolusie 3/1999 vir `n polshorlosie gekwalifiseer het, mag `n keuse gebied word tussen `n polshorlosie, soos in resolusie 3/1999 bedoel of die R3 000 kontanttoekenning soos in SDKBR-resolusie 6/2003 bedoel. |
| 2.2 |
|
In `n geval waar die werknemer/opvoeder in paragraaf 2.1 bedoel die polshorlosie kies, moet dit ingevolge die voorskrif wat deur die Minister vir Staatsdiens en Administrasie uitgereik is, deur die WKOD se eie verkrygingsproses by kleinhandelaars bekom word. |
| 2.3 |
|
Sodanige werknemer/opvoeder met 30 jaar diens is nie geregtig op die polshorlosie en die kontanttoekenning van R3 000 nie. Met ander woorde, indien die werknemer/opvoeder `n polshorlosie ingevolge SDKBR-resolusie 3/1999 ontvang het, is hy of sy nie ook geregtig op die kontanttoekenning van R3 000 nie, of omgekeerd. |
| 3. |
Om werknemers/opvoeders behulpsaam te wees in hul keuse van polshorlosies, indien hulle polshorlosies sou verkies, word afskrifte van brosjures met die spesifikasies en die kleinhandelspryse van die horlosies hierby aangeheg. Dit was ongelukkig nie moontlik om kleurbrosjures vir al die inrigtings/komponente van die Departement te verkry nie. Dit spyt my ook dat die brosjures slegs in Engels beskikbaar is. |
| 4. |
Werknemers/opvoeders wat tot op 31 Maart 2003 gekwalifiseer het, word versoek om die aangehegte keusevorm met betrekking tot `n polshorlosie of die R3 000 kontant te voltooi en om hul keuses ten opsigte van die tipe en modelnommer van die horlosies duidelik aan te dui, sou hulle horlosies verkies. Die basiese voorskrifte rakende verdiskontering van verlof, naamlik 10 dae verlof na 20 jaar diens en 15 dae verlof na 30 jaar diens plus `n sertifikaat, bly van krag en is volledig in Omsendbrief 216/2003 uiteengesit. |
| 5. |
Voltooide keusevorms ten opsigte van onderwyspersoneel moet gestuur word aan mnr MK Galant, Kamer 10-06, en dié ten opsigte van nie-onderwyspersoneel aan mev PD Phillips, Kamer 10-11, Grand Central Towers, by die adres wat op die briefhoof verskyn. |
| 6. |
Wat belangrik is ten opsigte van die diensvereiste is dat dit aaneenlopende diens van 20 of 30 jaar in `n staatsdepartement, `n staats- of staatsondersteunde skool of `n statutêre instelling, waarvan die funksies en personeel na die Staatsdiens oorgeplaas is, moet wees en dat die werknemer/opvoeder ingevolge `n wet wat aanstellings teen poste op die diensstate van die voormelde instellings reël, aangestel moet wees of moes gewees het. |
| 7. |
Die R3 000-kontanttoekenning is onderworpe aan belasting ingevolge die heersende belastingwetgewing. |
| 8. |
U word versoek om alle personeellede onder u beheer wat vir langdienstoekennings gekwalifiseer het of sal kwalifiseer, van die inhoud van hierdie omsendbrief te verwittig. |
GETEKEN: J.H. HURTER
HOOF: ONDERWYS
DATUM: 2003:12:02
|