1. Die SDKBR het Resolusie 15 van 2002 aangeneem wat die verlofbedeling vir nie-onderwyspersoneel wat aan inrigtings verbonde is, soos volg gewysig het:
1.1 Nie-onderwys personeellede by skole en opleidingsinstellings sal geregtig wees op 27 werksdae jaarlikse verlof, waarvan ten minste 22 dae gedurende die tydperk wanneer `n skool/opleidingsinstelling vir vakansies sluit, geneem moet word. Die oorblywende 5 dae mag geneem word wanneer die instelling se werksaamhede aan die gang is;
1.2 Die jaarlikse verlofvoorsiening moet in hierdie omstandighede as die minimum beskou word. Indien `n werknemer se dienste egter nie by `n inrigting benodig word gedurende die tydperk/e waartydens die inrigting vir vakansies sluit nie, mag sodanige werknemer sy of haar jaarlikse verlofvoorsiening gebruik en/of betaalde aftyd deur die werkgewer toegestaan word.
1.3 Die hoof van die inrigting moet verseker dat in die samestelling van die verlofrooster vir die werknemers wat hierdeur geraaak word, sy besluite op die beginsels van billikheid en redelikheid gebaseer is.

2. Met inagneming van die beginsels van billikheid en redelikheid -
2.1 moet jaarlikse verlof en vakansies waar aftyd ter sprake is, aan die begin van `n verlofsiklus, dit wil sê gedurende Januarie elke jaar beplan en geskeduleer word;
2.2 moet die proses van skedulering van die verlof deur die hoof van `n inrigting, in oorleg met die betrokke werknemers, geïnisieer word;
2.3 moet die volgende ten opsigte van tydperke van aftyd gedurende inrigtingsvakansies (wanneer leerders met vakansie is) in berekening gebring word:
2.3.1 indien dit nie van `n werknemer verwag word om spesifieke take te verrig of om vir ander operasionele/diensleweringsvereistes gedurende `n skoolvakansie beskikbaar te wees nie, hoef so `n werknemer, met die instemming van die hoof van die inrigting, nie vir diens aan te meld nie;
2.3.2 aktiwiteite/dienste wat gedurende inrigtingsvakansies moet plaasvind of gelewer moet word, moet egter steeds die nodige aandag kry;
2.3.3 skedulering en die aanbieding van formele opleiding aan alle nie-onderwys personeellede gedurende sommige van die vakansies kan oorweeg word;
2.3.4 'n rooster ten opsigte van aftyd moet opgestel word om aan elke personeellid `n regverdige geleentheid tot aftyd te bied in gevalle waar sekere aktiwiteite wel gedurende inrigtingsvakansies moet voortgaan/dienste gelewer moet word;
2.3.5 take moet sover moontlik tussen nie-onderwys personeellede geroteer word en indien moontlik moet die dienste van slegs `n klein groep personeellede wat die minimum vereiste dienste gedurende inrigtingsvakansies kan lewer, aangewend word. Daar moet in gedagte gehou word dat dit nie nodig is om die volle personeelkorps in diens te hou indien slegs minimum dienslewering nodig is nie.
2.3.6 Dit is belangrik om seker te maak dat die dienste van nie-onderwys personeellede gedurende inrigtingsvakansies slegs vir werklike amptelike diens aangewend word.
2.3.7 Hoofde van inrigtings, waar 'n kombinasie van kursusse, byvoorbeeld semester en trimester kursusse aangebied word, moet verseker dat die jaarlikse verlof en aftyd van nie-onderwys personeellede wat `n ondersteuningsdiens aan akademiese personeel lewer, gereël word ooreenkomstig die bedeling wat op die betrokke akademiese personeel van toepassing is.

3. VERLOFBEDELING VIR VERPLEEGPERSONEEL

Die bestaande verlofbedeling vir Verpleegpersoneel verbonde aan OLSO-skole bly onveranderd.

4. DATUM VAN IMPLEMENTERING

Die datum van implementering van die bostaande nuwe verlofbedeling is 1 Januarie 2004.

B. ANDER VERLOFAANGELEENTHEDE
1. BESKERMING (CAPPING) VAN VERLOF GEDURENDE DIE OORGANGSTYDPERK

As 'n eenmalige reëling sal die 50% verlofvoorsiening, of 'n gedeelte daarvan, wat vir die tydperk 1 Julie 2000 tot 31 Desember 2000 aan werknemers verskuldig was en wat deur sommige werknemers nie voor 30 Junie 2001 benut kon word nie, toegevoeg word tot die aantal dae wat voor 1 Julie opgeloop het en sedertdien beskerm word (capped leave).

2. MEDIESE SERTIFIKATE: MEDIESE PRAKTISYNS

Die definisie van "mediese praktisyn" is gewysig om soos volg te lees:

Praktisyns sal, vir hierdie doeleindes, alle praktisyns soos voorgeskryf deur die "Health Professionals Council of South Africa" wat wetlik gemagtig is om te diagnoseer en pasiënte te behandel, insluit.

C. ALGEMEEN

Alle lynbestuurders/toesighouers moet verseker dat die toestaan van vakansieverlof goed bestuur word, aangesien dit die beleid van die WKOD is dat geen ongebruikte verlofkrediete uitbetaal sal word nie.  Verder moet lynbestuurders, voordat die toestaan van vakansieverlof aanbeveel word, ook verseker dat personeelldede genoeg vakansieverlofkrediet het om die tydperk van verlof waarom aansoek gedoen word, te dek. Alle verlofvorms moet sonder versuim ingedien word, aangesien die ouditering van verlof `n baie hoë prioriteit van die Kantoor van die Ouditeur-Generaal geniet. U samewerking in hierdieverband sal gewaardeer word.

Verskoning word aangebied vir die Xhosa weergawe van hierdie omsendbrief wat nog nie beskikbaar is nie. Dit sal eersdaags uitgereik word.

Alle personeellede moet asseblief van die inhoud van hierdie omsendbrief ingelig word.


GETEKEN: G.J. ELLIOTT
HOOF: ONDERWYS
DATUM: 2003:12:01