1. As deel van die inleiding tot die bekendstelling van die Nasionale Kurrikulumverklarings in graad 10 in 2006 het die Wes-Kaap 'n kragtige multi-media oriënteringspakket voorberei. Dit is die bedoeling van die stelsel dat daar aanpassings tot onderwys en assessering gemaak moet kan word - insluitend die manier waarop vrae gestel en geassesseer word in eksterne Senior Sertifikaat-vraestelle - sodat die oorgang tot 'n UGO-benadering geleidelik en goed bestuur kan wees.

2. Daar is beperkings op opleidingsopsies as gevolg van 'n gebrek aan tyd, hoë koste en reisbeperkings. Verder het almal nie dieselfde kennisleemtes, belangstellings of leerstyle nie. Die WKOD het dus die multimedia-oriënteringstel ontwikkel om selfstudie te bevorder wat aanpas by die leerder en sy unieke werkstempo. Die pakket sal onderwysers oriënteer t.o.v. die hantering van die nuwe kurrikulum vir die VOO-band. Navorsers sal die doeltreffendheid van hierdie afstandsonderrig monitor.

3. Die pakket bestaan uit 'n CD-ROM, 2 video's, 'n handleiding en 'n meesterstiffie. Hierdie aangepaste leermodel sal skole en individue in staat stel om 'n gedetailleerde studie van UGO te maak en om die metodologie en beplanning daarvan op so 'n wyse te doen dat dit by hulle eie behoeftes en tydsbeperkings inpas.
3.1 Onderwysers sal selfstandig deur die CD-ROM kan werk. Die leerstof is vir die WKOD geskryf deur 'n aantal deskundiges op hulle gebiede en bestaan uit 300 bladsye teks- materiaal en meer as 30 videosnitte wat in die Wes-Kaap verfilm is.
3.2 Die video's sal die kern uitmaak van twee personeelvergaderings, gereël met tussenposes van agt weke, d.w.s. een agt weke na die bekendstelling van die proses en 'n tweede agt weke later. Die tydperke tussenin sal aan onderwysers die tyd verleen om die CD-ROM teen hulle eie tempo deur te werk.

4. Die modules op die CD-ROM is
4.1 "Oorsig oor leer", wat die leer- en onderrigstyle en breinfunksies ontleed en vrae insluit vir gebruikers waarvolgens hulle hulle eie leerstyle kan bepaal.
4.2 "Wat laat UGO werk?", wat 'n oorsig gee van onderwysstelsels in ander wêrelddele, kyk na ouers en leerders se aspirasies, en waar onderwysers ondervra word oor die gebruik van kritieke uitkomste in hulle onderrig, en
4.3 "UGO in Aksie", wat gedeeltes bevat oor die bestuur van differensiasie, assessering, beplanning en die rol en seleksie van leerondersteuningsmateriaal.

5. Dit is 'n interaktiewe model waarin gebruikers aangemoedig word om 'n elektroniese joernaal van hulle reaksies by te hou. Hierdie joernaal vorm dan 'n portefeulje en is die basis vir die toekenning van 'n sertifikaat. Gebruikers word aangemoedig om fasette te eksploreer na aanleiding van hulle belangstelling en behoeftes en om die klompie lastige kwessies direk aan te durf.

6. Die CD-ROM kan op soveel rekenaars as wat nodig is, afgelaai word. Elke onderwyser sal egter een stiffie nodig hê waarop elektroniese joernaalinskrywings vasgelê moet word indien hy/sy van verskillende rekenaars gebruik maak tydens die studieperiode.

7. Stelle sal versprei word deur die OBOS'e, wat oriënterings- en verpreidingsessies sal reël vroeg in die nuwe jaar. Pakette sal beskikbaar gestel word aan alle staatskole. Onafhanklike skole sal pakette by Edumedia kan aankoop. Sien http://edumedia.wcape.school.za/catalog vir meer besonderhede.

8. Die OBOS'e maak planne om te verseker dat skole wat nie oor genoegsame rekenaarfasiliteite beskik nie, ondersteun word met die bekendstelling van hierdie opwindende nuwe instrument. Toegang tot fasiliteite met rekenaars sal gereël word en opleiding en tegniese ondersteuning sal ook verskaf word aan onervare gebruikers.


GETEKEN: J.P. RAULT-SMITH
HOOF: ONDERWYS
DATUM: 2003:11:21