1. Aangeheg is die WKOD-assesseringsriglyne vir die AOO-band. Hierdie riglyne dui betekenisvolle vaartbelyning en konsolidasie van assesseringsvereistes vir die AOO-band aan en is opgestel om skole te help met die ontwerp van assesseringsprogramme vir graad R tot 9. Die wetlike raamwerk vir die riglyne verskyn op bladsy 2 van die dokument.

2. Let asseblief op die volgende vereistes vir 2004:

2.1 REKORDHOUDING
2.1.1 Graad R tot 9 sal vanaf Januarie 2004 die volgende nasionale koderingstelsel (kodes 1 tot 4) gebruik vir die formele rekordhouding van leerderprestasie:

4 = Leerder se prestasie het die vereistes van die leeruitkoms vir die graad oortref.

3 = Leerder se prestasie het aan die vereistes van die leeruitkoms vir die graad voldoen.

2 = Leerder se prestasie het gedeeltelik aan die vereistes van die leeruitkoms vir die graad voldoen.

1 = Leerder se prestasie het nie aan die vereistes van die leeruitkoms vir die graad voldoen nie.

(a) Senior Fase

  • Persentasies sal slegs in die Senior Fase aan hierdie kodes en beskrywers gekoppel word (verwys na Omsendbrief 122/2003 ).

(b) Intermediêre Fase

  • In die Intermediêre Fase sal die tweeledige koderingstelsel van NN tot 5 (formatief) en 1 tot 10 (summatief) vervang word deur die nasionale koderingstelsel (kodes 1 tot 4).

  • Alhoewel individuele toetse steeds met punte en persentasies beoordeel mag word, moet die formele rekordhouding van leerderprestasie teen die leeruitkomste gedoen word, met gebruikmaking van die nasionale koderingstelsel.
(c) Grondslagfase

  • In die Grondslagfase sal die koderingstelsel van NN tot 5 deur die nasionale koderingstelsel (kodes 1 tot 4) vervang word.

  • Formele rekordhouding van leerderprestasie moet teen die leeruitkomste gedoen word, met gebruikmaking van die nasionale koderingstelsel.
2.1.2 Die aangehegte riglyne verskaf besonderhede van die verskillende soorte rekords wat gehou moet word, bv. verslagboeke, portefeuljes, profiele en vorderingskedules.
2.1.3 Formele rekordhouding moet een keer per kwartaal volgens die aangehegte riglyne gedoen word.

2.2 MODERERING
2.2.1 Interne moderering van DASS op skoolvlak deur die vak-, graad- of fasehoof in die hele AOO-band is van die allergrootste belang. Dit is die verantwoordelikheid van die hoof om te verseker dat deeglike interne moderering gedoen word.
2.2.2 Daar sal ook eksterne moderering in graad 9 wees. Nie meer as 3 formele kluster-vergaderings mag in 2004 vir graad 9-onderwysers gehou word nie. Hierdie vergaderings sal onderskeidelik handel oor die stel van standaarde, ondersteuning en finale moderering.

2.3 VORDERING EN BEVORDERING
2.3.1 ’n Stelsel van vordering saam met die ouderdomsgroep is van toepassing in graad R tot 8 (verwys na Omsendbrief 111/2003 ). In graad 9 is ’n stelsel van bevordering van toepassing.
2.3.2 Die huidige graad 9-bevorderingsvereistes wat in Omsendbrief 111/2003 voorsien is, sal ook in 2004 van toepassing wees.
2.3.3 In graad 9 maak die GTA 25% van die finale bevorderingspunt van ’n leerder uit. Die GTA sal teen die einde van 2004 afgeneem word.

2.4 DEURLOPENDE ASSESSERING
2.4.1 Onderwysers moet deurlopend assesseer, leerders moet deurlopend bewyse genereer en die items wat die mees verteenwoordigend is van die algemene prestasie van leerders moet as bewyse gekies word vir vorderings- en modereringsdoeleindes.
2.4.2 Alle onderwysers word aangemoedig om ‘n verskeidenheid van assesseringstrategieë te gebruik.
2.4.3 Die leerderportefeuljes moet dien as ’n versameling van bewyse van hoe leerders die uitkomste bereik het. Portefeuljes moet vir ten minste drie maande na die einde van ’n skooljaar geberg word.
2.4.4 In graad R tot 8 maak DASS 100% uit van die vordering van ’n leerder in elke leerarea of leerprogram.
2.4.5 In graad 9 maak DASS 75% uit van die bevorderingspunt van ’n leerder.

  • Die assesseringsvereistes per leerarea in die Senior Fase word uiteengesit in die Senior Fase Deurlopende Assesseringsriglyne wat saam met Omsendbrief 0004/2003 uitgereik is en van toepassing bly in graad 7 tot 9.

  • Geen enkele assesseringsvorm in die Senior Fase mag vir meer as 25% van DASS tel nie.

  • Die items wat vir vordering of bevordering gekies word, moet ’n reeks uitkomste dek.

  • Senior Fase-onderwysers kan assesseringsvorme gebruik wat verskil van dié wat vir hulle leerareas aanbeveel is en kan na die Generiese Afdeling van die Senior Fase Deurlopende Assesseringsriglyne verwys vir voorbeelde.
3. BEPLANNING
3.1 In die Grondslagfase is die HNKV-leerareaverklarings die brondokumente vir beplanning. Die tabelle vir beplanning wat gedurende die Grondslagfase-opleiding aan skole beskikbaar gestel is, kan ook as waardevolle beplanningsinstrumente gebruik word.
3.2 Die Intermediêre en Senior Fases sal die WKOD-kurrikulumriglyne as hulle primêre beplanningsbron gebruik. Die HNKV-leerareaverklarings kan as hulpbron gebruik word om te help om die korrekte vlak van lesse en assessering te bepaal.

4. ’N WKOD-GRAAD 8-GEMEENSKAPLIKE TAAK VIR ASSESSERING (GTA) IN 2004
4.1 Die WKOD sal gedurende die eerste kwartaal van 2004 een kopie van ’n GTA vir elke leerarea vir graad 8 beskikbaar stel. Daar sal afsonderlike GTA’s wees vir Afrikaans, Xhosa en Engels op elk van drie vlakke: Huistaal, Iste Addisionele Taal en 2de Addisionele Taal. Die GTA’s word ontwerp om in die middel van die graad 8-jaar voltooi te word, om 2 uur te duur (een week) en om ’n 30-minuut Afdeling B (individuele taak) in te sluit. Die doel van hierdie oefening is om onderwysers te help om 'n toepaslike vlak vir DASS te vind.
4.2 Die GTA‘s is ontwikkel as voorbeelde van beste praktyk en sal dus nie verpligtend wees nie. Onderwysers sal egter groot voordeel put uit die gebruik van hierdie take in hulle graad 8-assesseringsprogram.

5. ALGEMEEN
5.1 Die meegaande dokument behandel al die bogenoemde punte volledig en moet sorgvuldig bestudeer word. Daarbenewens verskaf dit ook inligting oor “Appèlle” (die reg van ouers of voogde om te appelleer teen vorderings- en bevorderingsbesluite), “Intervensie en ondersteuning” en “Alternatiewe of aanpassings-assesseringsmetodes”.
5.2 Rekordhouding moet een keer per kwartaal gedoen word, met gebruikmaking van formele verslagkaarte.
5.3 Prinsipale word versoek om die inhoud van hierdie omsendbrief onder die aandag van alle belanghebbendes, insluitende onderwysers, ouers en leerders te bring.
5.4 Navrae rakende die inhoud van hierdie omsendbrief kan gerig word aan direkteure en hoofkurrikulmadviseurs verbonde aan OBOS’e.


GETEKEN: P.A. VINJEVOLD
HOOF: ONDERWYS
DATUM: 2003:11:19