1. Beleidsmaatreëls in bogemelde verband is vervat in Omsendbrief 47/2002 van 24 April 2002. Daar is egter met kommer kennis geneem dat nie alle rolspelers volkome duidelikheid het oor die toekenning, benutting en hantering van Leerondersteuningsposte (OLSO-poste) (KS-opvoeder posvlak 1-poste) by hoofstroomskole nie.
2. Die Wes-Kaap Onderwysdepartement (WKOD) se kernbeleid, soos uiteengesit in paragraaf 2 van bogemelde omsendbrief, is dat alle OLSO-poste aan die diensstate van OBOS’e gekoppel moet word sodat hulle op die mees ekonomiese wyse by een of meer skole benut kan word.
3. Indien ‘n skool egter voor 1 Julie 2001 ‘n OLSO-pos op sy diensstaat gehad het en die pos sedertdien permanent gevul is, behou sodanige skool die pos vir solank as wat daardie posbekleër dit vul. Sodanige pos sal as aanvullend tot die skool se diensstaat daarop aangedui word. Sodra so 'n pos egter vakant raak, sal dit oorgaan na die OBOS in die distrik waar die skool geleë is. Hierdie poste kan slegs ter ondersteuning van leerders met spesiale onderwysbehoeftes en ingevolge WKOD-beleid aangewend word. Dit impliseer dat die poste slegs op een of meer van die volgende wyses aangewend kan word:

  • Die OLSO-opvoeder help die opvoeders met die ondersteuning van soveel leerders met spesiale onderwysbehoeftes as moontlik binne die gewone hoofstroomklasse.

  • Indien bogenoemde benadering nie effektief in ‘n bepaalde klas of skool toegepas kan word nie, kan die OLSO-opvoeder die leerders met spesiale onderwysbehoeftes tydelik (vir een of meer onderrigperiodes) aan hoofstroomklasse onttrek en hulle weer so gou as moontlik nadat hulle ondersteuning ontvang het, na hulle klasse terugstuur.

  • Indien daar enkele leerders in ‘n skool is wat nie effektief op bogenoemde wyses ondersteun kan word nie, kan die OLSO-opvoeder hulle in ‘n kerngroepie by haar of hom hou, maar hierdie leerders moet so dikwels moontlik by hoofstroomklasse aansluit.

Vir meer duidelikheid oor bogenoemde werkswyses, skakel asseblief die leeronder-steuningskoördineerder en -fasiliteerder by u OBOS.
4. Die betrokke OBOS-direkteur sal, na goeddunke en met inagneming van die behoeftes van die skool wat die pos verloor, 'n pos wat van 'n skool losgemaak is of sal word, soos gemeld in paragraaf 3 hierbo en in paragraaf 3 van die gemelde omsendbrief, aanwend. Hierdie vakante pos sal op die gebruiklike manier in die Vakaturelys geadverteer word, maar dit sal die uitsluitlike taak van die OBOS wees om dit kragtens die voorgeskrewe prosesse te vul. 'n Skool wat deur die pos bedien word, kan ook by hierdie proses betrek word.
5. Skole wat ‘n behoefte aan OLSO-poste het, moet 'n skriftelik versoek by hulle betrokke OBOS-direkteur indien vir oorweging soos en wanneer sulke poste beskikbaar raak.
6. Bring asseblief die inhoud van hierdie omsendbrief onder die aandag van alle beheerliggame.


GETEKEN: J.H. HURTER
HOOF: ONDERWYS
DATUM: 2003:11:13