1. U word verwys na Omsendbrief 0074/1998 van 29 Junie 1998 waarin die beleid van toepassing op jaareindfunksies en tyd af vir Kersinkopies bekendgemaak is. Ten einde enige verwarring by personeellede oor wat verwag word en wat toelaatbaar is of nie te voorkom, word hierdie inligting geriefshalwe herhaal.
1.1 Bo en behalwe die toegewings wat normaalweg aan die einde van elke jaar gemaak word ten opsigte van korter werksdae op 24 en 31 Desember, sal personeellede toegelaat word om een Kersete gedurende die feesseisoen by te woon. Hierdie ete kan enige vorm aanneem, maar mag nie vroeër as die normale etenspouse, naamlik 12:30, `n aanvang neem nie. Personeellede sal egter nie verplig wees om na die ete na hulle kantore terug te keer nie.
1.2 Geen verdere versoeke ten opsigte van tyd af vir Kersinkopies of die bywoning van ander funksies sal goedgekeur word nie.
1.3 Dit is ook noodsaaklik dat reëlings vir funksies in samewerking met die betrokke lynbestuurders (Direkteursvlak) getref word. Slegs een subdirektoraat van `n spesifieke direktoraat behoort die gebou op `n gegewe tydstip te verlaat. Die personeel van die ander subdirektorate sal dan beskikbaar wees om noodsaaklike dienste te verrig en die telefone van die subdirektoraat wat by die jaareindfunksie betrokke is, te beantwoord. Die nodige reëlings sal met die skakelbord getref moet word.
1.4 Alle funksies behoort gedurende Desember plaas te vind ten einde te verseker dat werksaamhede nie vroeër al deur onderbrekings geraak word nie.
2. Bring asseblief die inhoud van hierdie omsendbrief onder die aandag van al die personeellede onder u beheer.


GETEKEN: J.H. HURTER
HOOF: ONDERWYS
DATUM: 2003:11:10