1. Dit het onder die aandag van die Wes-Kaap Onderwysdepartement (WKOD) gekom dat daar teenstrydighede is in die interpretasie en toepassing van baie aspekte van die Personeeladministrasiemaatreëls [PAM]. Die doel van die WKOD-beleid vir die bestuur van die werktyd van alle inrigtinggebonde opvoeders soos uiteengesit in die aangehegte beleidsdokument, is dus drievoudig.
1.1 Eerstens is die beleid daarop gemik om die vele interpretasies en toepassings van die PAM ten opsigte van die werktyd van opvoeders en al die sake wat daarmee verband hou, uit te skakel. Openbare verantwoordbaarheid vereis dat alle regeringsamptenare voldoen aan die regulerende wetgewing en beleid.
1.2 Tweedens is die beleid daarop gemik om ‘n eenvormige stelsel ten opsigte van die wetlike vereistes vir die werktyd, pligte, en werklading van inrigtinggebaseerde opvoeders in alle WKOD-inrigtings daar te stel.
1.3 Derdens stel die beleid hom ten doel om die reg van leerders om onderwys te ontvang gedurende die tye toegewys daaraan, te beskerm. Ouers verwag dat hulle kinders die volle voordeel van onderwys sal geniet terwyl hulle by die skool is. Artikel 28 [Handves vir Menseregte] in die Grondwet van die RSA konstateer dat “’n Kind se beste voordeel is van die allerhoogste belang in elke saak rakende die kind”.

2. Die WKOD wens sy waardering en dankbaarheid uit te spreek teenoor die skole en opvoeders wat hulle pligte nougeset nakom, soms onder uiters moeilike omstandighede. Ons loof die professionalisme van opvoeders wat hulle tyd opoffer om die kurrikulum effektief te lewer en ons kinders vir die toekoms voor te berei. Hierdie beleid is nie bedoel om die professionalisme en toegewydheid van opvoeders te bevraagteken nie, maar om skoolbestuurspanne te ondersteun, eenvormigheid teweeg te bring en die gehalte van dienslewering aan leerders in alle skole van die WKOD te verbeter.

3. Die beleidsdokument, ‘n omvattende, wetlik gebaseerde bestuursinstrument, is die resultaat van wye konsultasie met direktorate te Hoofkantoor, OBOS-direkteure en personeel en die Provinsiale Raad op Arbeidsverhoudinge in die Onderwys [PRAVO].

4. Hierdie beleid moet saamgelees word met Omsendbriewe 21/99, 52/99, 112/99, 14/2000, 114/2000, 40/2002, 97/2002, 162/2002 en 54-66/2003. Hierdie omsendbriewe word nie gekanselleer nie, maar, waar daar verskille ten opsigte van bestuur tussen die inhoud van die omsendbriewe en die beleidsdokument is, sal hierdie beleid geld.

Sien ook nota  "Instruksies aan skole en ontvangers"  hieronder.


5. Hierdie beleid sal onmiddellik van toepassing wees op alle openbare skole en onderwyssentrums van die WKOD, maar hierdie inrigtings sal tot Januarie 2004 die geleentheid kry om hulle roosters aan te pas.

6. Bring asseblief die inhoud van hierdie omsendbrief en beleid onder die aandag van alle opvoeders en beheerliggaamlede. Opvoeders moet versoek word om hierdie omsendbrief en beleid te lees, en dan die aangehegte vorm "Erkenning van ontvangs van inligting" te teken en te dateer. Die getekende vorm moet dan saam met die omsendbrief geliasseer word.


GETEKEN: R.B. SWARTZ
HOOF: ONDERWYS
DATUM: 2003:10:29

 

Instruksies aan skole en ontvangers:

Die delegasiedokument moet gedruk en aan die beleidsdokument geheg word aangesien dit deel daarvan is.

Die principaalverslagdokument is ook deel van die omsendbrief en moet deur die prinsipaal gedruk word en einde Maart 2004 voltooi en aan die kringbestuurder oorhandig word. Dit is om die beleid en die impak daarvan te evalueer.

NB:
Prinsipale word versoek om die beleidsdokument eers met hul Kringbestuurders deur te werk om korrekte interpretasie te verseker voordat die dokument aan die skool se personeel verskaf en verduidelik word.



Beleidsdokument  (grootte: 55 KB)
Erkenning van ontvangs van inligting  (grootte: 7 KB)

Delegasiedokument  (grootte: 7 KB)
Prinsipaalsverslagdokument  (grootte: 8 KB)