1. Die Wes-Kaap Onderwysdepartement (WKOD) word sedert sy totstandkoming in 1995 voortdurend gekonfronteer met die uitdaging om die onderwysbehoeftes in die provinsie gepas aan te spreek sodat kwaliteitonderwysgeleenthede aan alle leerders gebied kan word.

2. Dit impliseer enersyds dat nuwe skole op deurlopende grondslag gebou moet word waar die behoeftes die grootste is, maar andersyds ook dat toegesien moet word dat die beskikbare geriewe optimaal benut word.

3. In ooreenstemming met hierdie beleid, het die WKOD besluit om onderwysplanne vir die landelike OBOS’e op te stel. Hierdie konsepplanne wat as besprekings-dokumente tydens gesprekke met skoolgemeenskappe sal dien sodat hulle uiteindelik gefinaliseer kan word, behels die volgende:

  • Sluiting van klein skooltjies met minder as 25 leerders

  • Sluiting van skooltjies met meer as 25 leerders, waar sodanige sluiting deur die skoolgemeenskap versoek word en die WKOD daarvan oortuig is dat die versoek geregverdig is

  • Plasing van opvoeders wat deur sluiting geraak word in ooreenstemming met bestaande ooreenkomste

  • Amalgamasie van skole in kleiner dorpe waar daar nie regverdiging vir afsonderlike skole bestaan nie

  • Uitbreiding van leergange tot graad 8 en 9 waar prakties moontlik, sodat leerders so lank as moontlik uit hulle ouerhuise kan skoolgaan

  • Uitbreiding van die medium van onderrig sodat die groeiende getal leerders met 'n behoefte daaraan deur die medium van Engels/moedertaal onderrig kan ontvang

  • Uitbreiding en uitfasering van leerdervervoerskemas. Die uitgangspunt hier is dat leerders nie per departementele vervoerskema na ‘n ander skool in ‘n buurdorp vervoer kan word terwyl daar ‘n geskikte plaaslike skool is nie

  • Vestiging van VOO-inrigtings met vakaanbiedings na aanleiding van dorpe se oorhoofse behoeftes
4. Die volgende werkswyse word in die vooruitsig gestel:

  • ‘n Onderwysforum, bestaande uit die skoolhoof en die beheerliggaam van elke betrokke skool, en die kringbestuurder (die fasiliteerder) sal vir elke dorp gestig word. Ander rolspelers kan na goeddunke betrek word.

  • Oorhoofse beplanning vir die voorsiening van onderwys in elke dorp sal saam met die Onderwysforum gedoen word. Optimale benutting van elke skoolgebou sal die uitgangspunt wees.

  • Samesprekings sal met die werknemersunies gehou word.
5. Finale besluite oor die onderwysplan sal eers geneem word nadat

  • alle betrokke gemeenskappe behoorlik ingelig is.

  • in die geval van moontlike sluiting of amalgamasie van skole, asook die uitfasering van leerdervervoerskemas, openbare verhore gehou is waartydens alle belanghebbendes hulle insette kon lewer.

  • bogemelde insette aan die LUR vir Onderwys voorgelę is.
6. Aangesien hierdie ‘n baie sensitiewe aangeleentheid is, sal die WKOD dit as sulks probeer hanteer.

7. Hierdie omsendbrief vervang omsendbrief 0042/2003 en moet asseblief onder die aandag van alle belanghebbendes gebring word.


GETEKEN: R.B. SWARTZ
HOOF: ONDERWYS
DATUM: 2003:10:29