1. Die Onafhanklike Verkiesingskommissie (OVK) het 'n veldtog geloods om die publiek bewus te maak van die nasionale verkiesing van 2004. Die Wes-Kaap Onderwysdepartement ondersteun hierdie veldtog en wil graag hê dat leerders en hulle ouers aangemoedig moet word om die dienste wat deur die onderskeie departemente beskikbaar gestel word, te benut om te verseker dat hulle as kiesers vir die komende verkiesing geregistreer is.
2. Prinsipale word derhalwe versoek om leerders van 16 jaar en ouer aan te moedig en hulle behulpsaam te wees om 'n groen strepieskode-identiteitsdokument (ID) gratis te bekom indien hulle nie reeds oor een beskik nie. Waar getalle dit regverdig, kan prinsipale reëlings tref met die Departement van Binnelandse Sake wat op versoek mobiele eenhede of personeel beskikbaar sal stel om hierdie aansoeke te hanteer. So nie, moet leerders en ouers aangemoedig word om die mobiele eenhede of distrikskantore van laasgenoemde departement te besoek ten einde ID's te bekom.
3. Prinsipale word ook versoek om 'n opname te maak van leerders wat op die dag van die verkiesing 18 jaar en ouer, en dus stemgeregtig, sal wees. Waar daar 'n beduidende aantal leerders by 'n skool is wat nog nie as kiesers geregistreer is nie, is die OVK bereid om 'n beampte of beamptes op versoek vir hierdie doel beskikbaar te stel. Indien so 'n reëling nie moontlik is nie, moet die betrokke leerders aangemoedig word om by die plaaslike munisipale kantore, distrikskantore of klinieke as kiesers te registreer. Enige navrae in hierdie verband kan gerig word aan die plaaslike kantore van die Departement van Binnelandse Sake of die tolvrye nommer 0800 11 8000.
4. Die inhoud van hierdie omsendbrief moet asseblief onder die aandag van alle personeel, beheerliggaamlede en ouers en leerders van skole gebring word.


GETEKEN: J.H. LYNERS
HOOF: ONDERWYS
DATUM: 2003:11:05