VOO kolleges betree ‘n nuwe fase met betrekking tot die aanbieding van leerprogramme. Hierdie omsendskrywe is aanvullend tot Omsendskrywe No.: 0045/2000 en bepaal ‘n tussentydse beleid vir die berekening van VE getalle vir NKR geregistreerde kwalifikasies en eenheidstandaarde wat op verskillende wyses deur VOO kolleges aangebied word. Die implikasies van uitkoms gebaseerde onderwys (UGO), integrering van teorie en praktyk en die veranderende rol van opvoeders is tydens die bepaling van die tussentydse beleid in ag geneem. Die doel van die tussentydse beleid is om ‘n bemagtigende omgewing vir program aanbieding van openbare VOO kolleges te skep.

Die berekening van VE getalle word op spesifieke wyses van aanbieding gebaseer en die volgende algemene beginsels geld:

  • NKR geregistreerde kwalifikasies en eenheidstandaarde het spesifieke kredietwaardes

  • Die kredietwaarde kan omgesit word na begripsure (notional hours). 1 Krediet = 10 begripsure

  • Begripsure word gedefinieer as “die tyd wat ‘n gemiddelde persoon benodig om die verklaarde uitkomste van ‘n kwalifikasie/eenheidstandaard te bereik” (NKR SGB handleiding)

  • ‘n Begripsuur bevat die volgende elemente:

    • ‘klaskamer’ tyd
    • selfstudie tyd
    • tyd vir werkplek o pleiding
    • verdere inoefening en ondervinding benodig vir die bereiking van die uitkomste op die vlak soos bepaal deur die assessering standaarde

  • VE getalle word gebruik om VOO kolleges se diensstate te bepaal

  • WKOD sal alleenlik vooraf goedgekeurde VE getalle vir befondsing en personeeltoekenning gebruik

 
VE berekening vir spesifieke wyses van aanbieding

1. Leerderskappe

Alhoewel die Departemente van Onderwys en Arbeid VOO kolleges aanmoedig om betrokke te raak by die ontwikkeling en aanbieding van leerderskappe, moet befondsingsbeginsels duidelik gedefinieer word om die moontlikheid van dubbele befondsing te voorkom.

Die berekening van VE getalle word op die volgende kriteria gebaseer:

  • Leerderskappe bestaan uit teoretiese en praktiese komponente wat lei tot die verdeling van begripsure tussen ‘n spesifieke persentasie institusionele (teorie) opleiding en ‘n verdere persentasie werkplek (praktiese) opleiding en blootstelling

  • Die Departement van Arbeid verskaf befondsing aan die werkgewer deur Sektor Onderwys en Opleiding Owerhede (‘SETA’s’) vir werkplek opleiding

  • Die Departement van Arbeid verskaf befondsing aan die leerder deur Sektor Onderwys en Opleiding Owerhede (‘SETA’s’) vir institusionele onderwys en opleiding

  • Leerderskap befondsingsmodelle verskil ten opsigte van SETA spesifikasies en die tipe leerderskappe

Vereistes ten opsigte van VE getalle vir leerderskappe

1.1 WKOD ontleed SETAs se befondsingsmodelle vir individuele leerderskappe en erken slegs VE getalle wat nie deur SETAs befonds word nie
1.2 Deur die kredietwaarde en gepaardgaande begripsure vir ‘n spesifieke leerderskap as basis te gebruik, mag die persentasie begripsure vir institusionele opleiding soos bepaal deur die leerderskapkontrak as VE getalle ge-eis word
1.3 ‘n Verdere 20% van die begripsure ten opsigte van die doelstellings van werkplek gerigte aktiwiteite en assessering mag ge-eis word
1.4 Kolleges behoort die kosteberekening van ‘n leerderskap te baseer op die direkte sowel as indirekte kostes van diensverskaffing. Kostes ten opsigte van WKOD opvoeders word deur die erkenning van VE getalle gedek
1.5 Die berekening van VE getalle is onderworpe aan ouditering soos bepaal deur WKOD omsendskrywe 45/2000. Die beplande VE getalle vir leerderskappe moet deur akademiese en kollege rade goedgekeur en in kolleges se voorgestelde onderrig aanbieding opgeneem word.
1.6 Die finale goedkeuring berus by WKOD. Aansoeke vir die aanbieding van nuwe programme sal prioriteit geniet. WKOD sal binne 21 dae na die ontvangs van die aansoek ‘n antwoord verskaf. 
Voorbeeld:

  Die Vroeë Kind Ontwikkeling Vlak 4 leerderskap het ‘n
  kredietwaarde van 120 wat omgeskakel kan word na 1200
  begripsure. Die leerderskap maak voorsiening vir 30%
  institusionele en 70% werkplek onderrig en ondervinding.

  VE berekening:
  30 + 20 = 50% of 1200 begripsure = 600 

  600 ÷ 900 = 0.67 VE
  (NB: 1 VE = 900 uur)
    

Hierdie berekening is ‘n tussentydse maatreël wat geldig bly tot verdere kennisgewing..

2. Ander wyses van programaanbieding wat op NKR/eenheidstandaard kwalifikasies en gedeeltelike kwalifikasies gebaseer is

VE berekening word bepaal deur die volgende komponente van ‘n begripsuur:

  • ‘klaskamer’ tyd, insluitende assessering (toetse, mondelinge, take, assessering van praktika onder normale werkdrukte in werklike of gesimuleerde werksituasies)

  • verdere inoefening en ondervinding wat benodig word om die uitkomste op die standaard soos bepaal deur die assessering kriteria te bereik

2.1 Kolleges inisieer die proses van VE waardebepaling deur ‘n voorstel vir die erkenning van VE getalle vir ‘n spesifieke leerprogram aan WKOD te rig.
2.2 Die voorstel moet aan Die Direkteur: VOO vir oorweging en goedkeuring gerig word. Die kollege se akademiese en kollege rade moet die voorstel steun.
2.3 Die proses sal gebruik word vir die bepaling en erkenning van VE getalle.
2.4 Die VE waardes van individuele eenheidstandaard gebaseerde programme sal tot die bylaes van Omsendskrywe 45/2000 gevoeg word soos behoeftes ontstaan

3. VE verswaring

Binne die bestaande raamwerk van Omsendskrywe 45/2000 sal WKOD voortaan ‘n jaarlikse lys van verswaringsfaktore vir geidentifiseerde programme uitreik. Die volgende kriteria sal gebruik word vir die identifisering van programme:

3.1 Nasionale behoeftes
3.2 Provinsiale behoeftes
3.3 VOO Direktoraat se strategiese plan
3.4 NKR vlak

Die doel van die herberekening is om kolleges aan te moedig om in die behoeftes van industrie en gemeenskappe te voorsien deur relevante onderrigprogramme binne hul mandaat aan te bied.


GETEKEN: P.A. VINJEVOLD
HOOF: ONDERWYS
DATUM: 2003:10:06