1. Die Godsdiens- en Onderwysbeleid is op 12 September 2003 in die Staatskoerant, Deel 459, nr. 25459 gepubliseer. Hierdie Staatskoerant word aan alle skole gepos. In die volgende paragrawe word daar verwys na sekere afdelings van hierdie beleid.

2. Die doel van die beleid is die uitbouing van die gemeenskap in Suid-Afrika deur die bevordering van agting vir ons godsdienstige diversiteit. Die beleid maak voorsiening vir die toepaslike hantering van drie bepaalde aspekte van godsdiens in skole: verpligte Godsdiensonderwys, gekontroleerde Godsdienstige Gebruike en vrywillige Godsdiensonderrig.

3. Die Departement is bewus van sensitiwiteit rondom die beleid en wil graag daarop wys dat die regte van leerders en onderwysers soos uiteengesit in afdelings 13 en 35 gerespekteer moet word ooreenkomstig die gees en letter van die beleid. Sekere bepalings van die beleid is gewysig vir toepassing in Onafhanklike skole (kyk afdeling 16).

4. Elektroniese kopieë van die beleid is beskikbaar van die WKOD-webblad by die volgende adres: http://curriculum.wcape.school.za

5. Addisionele gedrukte kopieë van die Nasionale Beleid oor Godsdiens en Onderwys (Staatskoerant, Deel 459, nr. 25459 van 12 September 2003) is verkrygbaar by die Staatsdrukker (telefoon (021) 465-7531), Pleinstraat 90, Kaapstad, teen R5 elk. Kopieë kan per pos versoek word van die Staatsdrukkery, Posbus 571, Kaapstad, 8000. Tjeks en posorders moet uitgemaak word aan “Staatsdrukkery” en moet die bestelling vergesel.

6. Verdere inligting oor die kurrikulum kan verkry word van die Kurrikulumadviseurs vir Lewensoriëntering by OBOS'e. Kringbestuurders kan genader word in verband met die implementering van die beleid soos dit van toepassing is op Godsdienstige Gebruike en Godsdiensonderrig.


GETEKEN: B.K. SCHREUDER
HOOF: ONDERWYS
DATUM: 2003:10:06