1. Hierdie omsendbrief moet saamgelees word met Omsendbrief 0137/2002.
2. Hoofde en sentrumbestuurders van opvoedkundige inrigtings wat kandidate vir die openbare eksamens inskryf, moet daarop let dat hulle ook verantwoordelikheid moet aanvaar vir die volgende addisionele pligte:
2.1 Kandidate moet korrek ingeskryf wees vir die eksamens.
2.2 Alle punte vir skoolgebaseerde assesseringsaktiwiteite (mondeling, prakties, deurlopende assessering) moet gemodereer en betyds ingestuur word.
2.3 In konsultasie met die skool se beheerliggaam, moet geskikte lede van die gemeenskap genomineer word as hoofopsiener en opsiener(s). Hierdie persone moet goeie aansien in die gemeenskap geniet, goed kan sien, in goeie gesondheid verkeer, en in staat wees om die eksameninstruksies te verstaan en te implementeer.
2.4 Saam met die hoofopsiener en die kringbestuurder moet hulle die eksamenskryfbehoeftes en -vraestelle teenoor die verpakkingslyste nagaan, asook alle bykomende besendings vraestelle wat tydens die verloop van die eksamens arriveer.
2.5 Die plastiekomhulsel om die vraestelle moet onbeskadig wees, en die hoofnasiener moet daaraan herinner word dat hierdie plastiekomhulsel NIE voor die begin van die eksamen verwyder mag word NIE.
2.6 Vraestelle en relevante puntelyste moet in ooreenstemming met die volgorde van die eksamenrooster geberg word.
2.7 Die sleutel van die brandkas/kluis moet beveilig word en mag slegs aan die adjunkhoof/-sentrumbestuurder gegee word as die hoof/sentrumbestuurder nie by die skool teenwoordig kan wees vir 'n eksamensessie nie. In so 'n geval moet 'n brief waarin die verantwoordelikheid vir die eksamens tydens die afwesigheid van die hoof/sentrumbestuurder aan die adjunkhoof/-sentrumbestuurder gedelegeer word, aan hom/haar gegee word. 'n Afskrif van hierdie delegering moet aan die kringbestuurder gestuur word. Geen persoon behalwe die hoof/sentrumbestuurder, of sy/haar gedelegeerde adjunk, mag toegang hê tot die plek waar die vraestelle, antwoordboeke en skrifte geberg word nie. Enige duplikaatsleutel(s) vir die kluis moet by die OBOS ingelewer word waar die nodige kwitansie uitgereik sal word. Elke skool moet verseker dat hul OBOS 'n duplikaatsleutel vir hul kluis het.
2.8 Die korrekte vraestelle moet voor die aanvang van elke eksamensessie aan die hoofopsiener oorhandig word en hy/sy, die vakhoof en die hoof/sentrumbestuurder moet kontroleer of die korrekte vraestelle beskikbaar gestel is.
2.9 Voor elke eksamensessie moet al die kandidate in die eksamenlokaal geïdentifiseer word as dié wat vir die betrokke eksamen geregistreer is. Kandidate wat nie aan die hoof/sentrumbestuurder bekend is nie, moet hulle identiteitsdokumente toon.
2.10 Indien voltydse kandidate nie betyds vir die aanvang van 'n eksamensessie opdaag nie, moet daar bepaal word waarom hulle laat of afwesig is, en 'n geskrewe rekord van die redes hou.
2.11 Alle toerusting wat vir eksamendoeleindes benodig word, moet beskikbaar en in 'n goeie werkende toestand wees. Toepaslike en voldoende sekuriteitsmaatreëls moet daargestel word vir die apparatuur en netwerk in die rekenaarkamer waar die eksamens in Rekenaartik en Rekenaarstudie afgeneem sal word.
2.12 As daar enige onreëlmatighede is met die skryf van 'n eksamen, moet daar sonder versuim met die kringbestuurder in verbinding getree word sodat hy/sy na die sentrum kan gaan om onmiddellik ondersoek na die beweerde onreëlmatigheid in te stel. Saam met die hoofopsiener moet 'n poging aangewend word om die kandidaat te oorreed om 'n beëdigde verklaring oor die insident te maak. In die geval van 'n minderjarige, moet hierdie verklaring in die teenwoordigheid van sy/haar ouer(s) of voog(de) gemaak word. Die hoof/sentrumbestuurder moet ook 'n beëdigde verklaring oor die beweerde onreëlmatigheid in die teenwoordigheid van die kringbestuurder maak.
2.13 Aan die einde van elke eksamen moet die hoof die verseëlde antwoordskrifte, bywoningsverslag en sitplekplanne van die hoofopsiener ontvang en in die kluis weggesluit word totdat die departement dit kom afhaal.
2.14 As die skool tydens die aflê van die eksamens 'n waarnemende hoof/-sentrumbestuurder het, is hy/sy verantwoordelik vir die verkryging van 'n magtigingsbrief van die kringbestuurder waarin hy/sy as die verantwoordelike beampte aangestel word.
3. Hoofde/Sentrumbestuurders moet asseblief die aangehegte antwoordstrokie voltooi en dit binne 5 dae na ontvangs stuur aan die Senior Kringbestuurder van die betrokke OBOS om bewys te lewer dat die inhoud gelees is.
4. Hoofde en hulle personeel word hartelik bedank vir hulle ondersteuning om die integriteit en sukses van die eksamens te verseker.

GETEKEN: P.A. VINJEVOLD
HOOF: ONDERWYS
DATUM: 2003:09:30

Antwoordstrokie  (grootte: 10 KB)