Geagte Prinsipaal/Opvoeder/Matriekkandidaat

Dit het al weer tyd geword vir alle kandidate vir die Senior Sertifikaat-eksamen om hulle voor te berei vir die finale eksamens. Ek wil graag alle opvoeders wat onvermoeid gearbei het om te verseker dat kandidate goed voorbereid is vir die eksamens hartlik bedank. Ek sal dit waardeer indien prinsipale sal seker maak dat alle matrikulante hierdie brief ter insae kry.

Aan elke matrikulant, onthou hierdie is maar net nog 'n eksamen. In 'n sekere sin het jy jou vir die afgelope twaalf jaar vir hierdie geleentheid voorberei. Onthou ook dat jy alreeds sekere punte in jou sak het - jou deurlopende assesseringspunte wat jy in die loop van die jaar opgebou het. Die eksamens wat voorlê is belangrik omdat dit nie alleen die voltooiing van 'n besondere fase van jou lewe verteenwoordig nie, maar ook die begin van die res van jou lewe. Dit is dus nie slegs 'n einde nie, maar ook 'n begin.

Ek wil ook graag vir jou vra om te onthou dat elke geleentheid vir deeglike finale voorbereiding belangrik is en 'n verskil kan maak aan die uiteindelike uitslag. Hiermee dus beste wense vir jou finale voorbereiding en beste wense met die eksamens!

Ek vertrou dat jy trots sal wees op jou prestasie en dat jou uitslae weereens die Wes-Kaap sal help om in 2003 'n uitstekende stel uitslae te behaal in die Senior Sertifikaat-eksamens.

Mag al die ure se harde werk vir die eksamen in jou uitslae weerspieël word en mag dit dien as basis vir 'n blink toekoms.

Die uwe

GETEKEN: R.B. SWARTZ
HOOF: ONDERWYS
DATUM: 2003:09:26