| 1. |
Die stigting van die Kaapse Akademie vir Wiskunde, Wetenskap en Tegnologie in Constantia, een van Kaapstad se suidelike voorstede, maak deel uit van die Wes-Kaap Onderwysdepartement (WKOD) se strategie om die standaard van Wiskunde en Wetenskap in die Provinsie te verbeter. Die Kaapse Akademie is op 10 Maart 2003 amptelik bekendgestel deur die Premier van die Wes-Kaap. |
| 2. |
Die eerste 210 Graad 10-leerders sal in Januarie 2004 toegelaat word. Daar word beplan om ‘n verdere 250 leerders per jaar in 2005 en 2006, onderskeidelik, toe te laat. Dit beteken dat die Akademie beoog om in 2006 onderrig vanaf graad 10 tot 12 aan 710 leerders te bied. |
| 3. |
Die primêre doel van die Akademie is om hoëvlakonderrig aan graad 10- tot 12-leerders met bewese potensiaal te bied, veral aan leerders afkomstig uit voorheen benadeelde gemeenskappe. In 'n later stadium kan die kurrikulum moontlik uitgebrei word om graad 8 en 9 in te sluit.
|
| 4. |
Die Kaapse Akademie sal die volgende vakke aanbied: Afrikaans, Engels, Xhosa, Wiskunde, Biologie, Natuur- en Skeikunde, Rekenaarstudie/Inligtingstegnologie en Lewensoriëntering. Die onderrig sal egter toegespits wees op Wiskunde, Natuur- en Skeikunde en Rekenaarstudie op die Hoër Graad. Al die vakke sal deur Afrikaans- of Engelsmedium onderrig word. |
| 5. |
Die Kaapse Akademie sal ook benut word as ‘n ondersteuningsentrum vir opvoeders en leerders, 'n bronnesentrum vir kurrikulumnavorsing- en ontwikkeling en ‘n gespesialiseerde indiensopleidingsentrum vir opvoeders en onderwysstudente.
|
| 6. |
Aangesien hoë eise aan leerders gestel sal word, word leerders wat bewese potensiaal vir hierdie vakke het en bereid is om hard te werk, uitgenooi om aansoek om toelating by die Kaapse Akademie te doen. |
| 7. |
Hoofde moet daarop let dat dit nie die WKOD se doel is om skole van hulle beste leerders te ontneem nie, maar om aan leerders, veral dié uit voorheen benadeelde gemeenskappe, die geleentheid te bied om hulle potensiaal aan ‘n internasionaal-ondersteunde akademie te ontwikkel. Die Akademie bied gesofistikeerde fasiliteite asook hoogsgekwalifiseerde en ervare opvoeders wat reeds senior leerders geïnspireer het om uitstekende resultate te behaal. |
| 8. |
Die Kaapse Akademie sal in 2004 koshuisfasilitiete vir 60 leerders hê. Busvervoer tussen die naaste spoorwegstasie en die Akademie sal vir dagleerders beskikbaar wees. |
| 9. |
Skoolgelde sal ingevolge die SA Skolewet, Wet 84 van 1996, en WKOD-beleid gehef word. Die toekenning van beurse aan behoeftige leerders kan oorweeg word. Verdere besonderhede kan verkry word by die Direktoraat: Gespesialiseerde Onderwysondersteuningsdienste by telefoon (021) 467 2027. |
| 10. |
Die voltooide aangehegte aansoekvorm, met die vereiste dokumentasie, moet die Hoof van die Kaapse Akademie, Privaatsak X3, TOKAI, 7966 bereik teen nie later nie as 24 Oktober 2003.
|
| 11. |
Hoofde word versoek om die ingeslote pamflet te versprei, die inhoud van hierdie omsendbrief onder die aandag van alle betrokke opvoeders, ouers, voogde en leerders te bring en om leerders wat van hierdie unieke geleentheid gebruik wil maak, behulpsaam te wees. |
GETEKEN: R.B. SWARTZ
HOOF: ONDERWYS
DATUM: 2003:09:23
|