A. AGTERGROND

Die diensstate van gewone openbare skole is bepaal volgens die nasionale Hersiene Posvoorsieningsmodel (HPVM) wat as Bylae A aangeheg was aan Omsendbrief 0143/2002 van 15 November 2002. Dit beteken dat dieselfde beginsels en maatreëls wat vir die 2003- diensstate gebruik is, ook vir 2004 gebruik is.

Soos bepaal deur wetgewing, het die Wes-Kaap Onderwysdepartement (WKOD) oor die personeelvoorsiening van gewone openbare skole beraadslaag met die werknemerspartye in die Raad op Arbeidsverhoudinge in die Onderwys (RAVO) en die erkende skoolbeheerligaamverenigings.


B. MAATREëLS (BREë BEGINSELS)
1. Die voorsiening van poste aan "Afrondingskole" word tot verdere kennisgewing op ‘n ad hoc-grondslag gehanteer.
2. Ingevolge die maatreëls van die HVPM, moet gewone openbare skole jaarliks voor die einde van September van die voorafgaande jaar van hulle diensstate voorsien word. Dit beteken dat alle diensstate wat aan gewone openbare skole uitgereik is, sowel as alle addisionele posvlak 1-poste wat gedurende 2002 op ‘n ad hoc-grondslag as gevolg van 'n toename in leerdertal of die kurrikulumbehoeftes van 'n inrigting geskep is, aan die einde van 2003 sal verval.
3. Die ad hoc-poste (bo en behalwe die poste aangedui in die vaste diensstaat van 'n skool) wat aan die einde van 2002 vir benutting gedurende 2003 aan skole toegeken is ten einde te verseker dat sekere skole ‘n leerder:opvoederbedeling van 33:1 (primêr) of 39:1 (sekondêr) handhaaf, sal ook aan die einde van 2003 verval.
4. Skole sal in ‘n aparte brief van hulle posisie met betrekking tot die ad hoc-poste vir 2004 ingelig word.
5. Die postestruktuur en omskrywings soos vervat in Kollektiewe Ooreenkoms 4/2003 van die RAVO is van toepassing op die diensstate. Verwys asseblief na Omsendbrief 0161/2003 van 25 Julie 2003 in hierdie verband. Hoofde van onderwysinrigtings moet daarop let dat die nuwe poste- en salarisstruktuur voorsiening maak vir poste van Onderwyskundige, voorheen bekend as Departementshoof. Hierdie poste van Onderwyskundige is gevestig in die loopbaanstrukture “Onderrig en Leer” en “Bestuur”. Die WKOD is tans besig om norme en kriteria vir die benutting van hierdie poste daar te stel en gevolglik is besluit om nie die aantal poste van Onderwyskundige tussen “Onderrig en Leer” en “Bestuur” te verdeel nie. Hierdie poste sal, as tussentydse maatreël, as Onderwyskundige geklassifiseer word totdat die WKOD duidelike riglyne met betrekking tot die benutting van die poste kan verskaf.
6. Aandag word daarop gevestig dat poste van prinsipaal, met uitsondering van prinsipaal P1 wat nou op posvlak 2 is, volgens Kollektiewe Ooreenkoms 4/2003 van die RAVO op posvlak 4 geplaas is. Die graderingsnorme ten opsigte van die prinsipaalsposte is egter nog nie in die RAVO gefinaliseer nie en gevolglik moet alle skole hulle 2003-graderings tot verdere kennisgewing behou.

C. DIENSSTATE: 2004
1. VERMEERDERING IN DIE AANTAL POSTE
1.1 In 'n geval waar daar ‘n vermeerdering in die aantal opvoedersposte is, kan die nuutgeskepte poste op die volgende wyses gevul word:
1.1.1 Opname en plasing (herontplooiing) van botallige opvoeders (let daarop dat opname en plasing van botallige opvoeders ‘n deurlopende proses is wat voorrang bo die advertering van poste sal geniet)
1.1.2 Deur middel van advertering in die vakaturelys met die oog op die permanente vulling daarvan (Dit beteken dat posvlak 1- en bevorderingsposte by die eerste die beste geleentheid geadverteer moet word.)
1.1.3 Op ‘n kontrakbasis of in ‘n waarnemende hoedanigheid ooreenkomstig die bestaande beleidsvoorskrifte
1.2 Volledigheidshalwe moet daar gemeld word dat die beleidsmaatreël waarvolgens kontrakaanstellings vir ‘n tydperk van hoogstens ses maande op ‘n slag gemaak word, steeds van krag bly.

2. VERMINDERING IN DIE AANTAL POSTE
2.1 In ‘n geval waar daar ‘n vermindering in die aantal poste is (dit wil sê 'n pos of poste is afgeskaf), mag die onderwysinrigting slegs poste vul tot die perk wat op die diensstaat aangedui is. Dit volg dus dat ‘n onderwysinrigting nie meer poste mag vul as waarvoor in die diensstaat voorsiening gemaak is nie.
2.2 Indien daar egter meer permanent-aangestelde opvoeders is as waarvoor die diensstaat voorsiening maak, kan die onderwysinrigting nie enige verdere aanstellings, hetsy permanent of op kontrakbasis, maak nie.
2.3 Inrigtingshoofde word ook herinner daaraan dat die WKOD nie plaasvervangers toewys aan 'n inrigting waar daar meer permanent-aangestelde opvoeders as poste is nie.
2.4 Permanent-aangestelde opvoeders moet volgens Kollektiewe Ooreenkoms 2/2003 van die RAVO as botallig geïdentifiseer word.

3. VUL VAN GEADVERTEERDE POSTE
3.1 Alle poste wat reeds in 'n departementele vakaturelys as vakant geadverteer is, mag op ‘n permanente grondslag gevul word indien die pos in die 2004-diensstaat verskyn.
3.2 Indien ‘n geadverteerde pos nie in die 2004-diensstaat verskyn nie, is die inrigting nie geregtig op daardie pos nie en so ‘n pos sal as foutiewelik geadverteer beskou word.
3.3 Die maatreël waarvolgens geadverteerde poste (veral bevorderingsposte) slegs gevul mag word indien dit nie verdere botalligheid tot gevolg sal hê nie, bly steeds van krag.
3.4 Indien inrigtingshoofde en beheerliggame die mening toegedaan is dat die geadverteerde pos se werkomskrywing nie meer aan die inrigting se kurrikulumbehoeftes voldoen nie, kan hulle die WKOD versoek om die pos as foutiewelik geadverteer te beskou. ‘n Volledige motivering moet so ‘n versoek vergesel.

4. BOTALLIGE OPVOEDERS
4.1 Opvoeders wat reeds aan die hand van vorige diensstate ingevolge vorige prosesse as botallig verklaar is en steeds botallig is, behou hulle botalligheidstatus. Hierdie opvoeders sal gehanteer word ingevolge die geldende kollektiewe ooreenkomste van die RAVO.
4.2 Hierdie botallige opvoeders (kyk paragraaf 4.1 hierbo) kan in vakatures op die nuwe diensstaat by wyse van opname en plasing geabsorbeer word (sien paragraaf C1.1.1).
4.3 Soos aangedui in paragraaf C.2.2 van hierdie omsendbrief, moet permanent-aangestelde opvoeders ingevolge Kollektiewe Ooreenkoms 2/2003 van die RAVO as botallig geïdentifiseer word.

D. NAVRAE

Navrae rakende hierdie omsendbrief (maatrëels, ens.) moet aan kringbestuurders gerig word, of aan die Direktoraat: Personeelbestuur (Opvoeders) (Mnre. H. Wyngaard (021 467 2499 of M. Apollis (021 467 2488)).

E. ALGEMEEN

Bring asseblief die inhoud van hierdie omsendbrief onder die aandag van alle opvoeders en beheerliggame.

U samewerking sal hoog op prys gestel word.

GETEKEN: R.B. SWARTZ
HOOF: ONDERWYS
DATUM: 2003:09:15


Die dokumente, waarna verwys word as bylaes by die omsendbrief, word nie aangeheg nie maar is as drukstukke beskikbaar.