1. 'n Paar geïsoleerde gevalle van leerders op skool wat meningitis opgedoen het, is by die Wes-Kaap Onderwysdepartement aangemeld.
2. Slegs een geval van meningitis is bevestig in die provinsie en skole word aangeraai om dit nie as 'n "uitbreek van die siekte", soos gerapporteer is, te beskou nie. Om skole egter behoorlik in te lig en voor te berei, is 'n pamflet van die Departement van Gesondheid ingesluit vir u aandag.
3. Indien 'n mediese praktisyn u skool sou kontak aangaande 'n bevestigde geval van meningitis by een van die leerders of opvoeders van die skool, moet die volgende stappe onmiddellik deur die prinsipaal en skoolbeheerliggaam geneem word:

  1. Kontak moet gemaak word met die Onderwysbestuurs-en-ontwikkelingsentrum (OBOS) om die bevestigde diagnose by die skool te rapporteer.

  2. Die OBOS moet die Oordraagbaresiekte-eenheid van die Streeksgesondheidsdienste kontak. Die Streeksgesondheidsdienste sal op skoolvlak intree om die risikovlak by die skool te monitor en te evalueer. Die risiko van infeksie kan as laag, medium of hoog ge-evalueer word, op grond van 'n verskeidenheid faktore wat deur die Gesondheidsdienstespan in ag geneem sal word.

  3. Aanbevelings van verdere stappe sal deur die Gesondheidsdienstespan en die OBOS-bestuur gedoen word met opvolgmonitering waar nodig.
4. Hoofde van onderwysinrigtings word ernstig versoek om hierdie aangeleentheid nie ligtelik op te neem nie en om hierdie stappe te neem indien daar ooit wel 'n geval van meningitis by hulle skool aangemeld word.


GETEKEN: R.B. SWARTZ
HOOF: ONDERWYS
DATUM: 2003:08:28

Meningitis pamflet  (grootte: 15 KB)