1. Die volgende logistieke reëlings is goedgekeur om te verseker dat die 2003-skooljaar op ‘n ordelike wyse ten einde loop.
2. Die Nasionale Minister van Onderwys het aangekondig dat die 2003 Senior Sertifikaat-eksamenuitslae vir alle provinsies op Dinsdag 30 Desember 2003 bekendgemaak sal word.
3. Om te verseker dat die Wes-Kaap Onderwysdepartement die uitslae betyds gereed sal hê, moet die nasien van die eksamenskrifte op Dinsdag 2 Desember 2003 begin.
4. Die vierde kwartaal eindig op Vrydag 5 Desember 2003 vir leerders en op Dinsdag 9 Desember 2003 vir opvoeders.
5. Aangesien die laaste dag van skoolbywoning vir alle leerders van graad R tot 11 Vrydag 5 Desember 2003 is, moet die interne assessering aan die einde van die jaar soos volg geskied:
5.1 Graad R tot 7

Graad R- tot 7-opvoeders kan hulle dokumentasie vir Deurlopende Assessering (DASS) en hulle progressieskedules gedurende die laaste week van November 2003 finaliseer aangesien daar nie van hierdie leerders verwag word om eksamens te skryf nie.
5.2 Graad 8

Toetse wat in graad 8 deel van DASS uitmaak, moet tussen Donderdag 6 November 2003 en Dinsdag 25 November 2003 geskryf word.

.
5.3 Graad 9

Die Gemeenskaplike Take vir Assessering (GTA's) moet op die volgende wyse gehanteer word:

Afdeling A: Maandag 6 Oktober tot Vrydag 7 November 2003 gedurende normale skoolure.

Afdeling B: Vanaf Maandag 10 November 2003 tot Vrydag 21 November 2003 soos per nasionaal-verspreide tydrooster (verwys na Omsendbrief 122/2003).
5.4 Graad 10 en 11

In sekondêre skole kan die eksamens geskryf word in die loop van 'n maksimum van 14 dae. Die interne eksamens vir graad 10 en 11 moet tussen Donderdag 6 November 2003 en Dinsdag 25 November 2003 geskryf word om te verseker dat die nodige prosedures afgehandel is en die dokumentasie betyds gereed is vir die moderering en progressie wat teen Maandag 8 Desember 2003 deur die OBOS- multifunksionele spanne voltooi moet wees. Alle eksamenroosters moet vir finale goedkeuring by die betrokke OBOS-direkteur ingedien word.
6. Eksamenreëlings vir graad 12-leerders
6.1 Die Senior Sertifikaat-eksamens begin op Maandag 13 Oktober 2003 en eindig op Vrydag 21 November 2003.
6.2 Die laaste dag van skoolbywoning vir graad 12-leerders voor die aanvang van die Senior Sertifikaat-eksamen is Woensdag 8 Oktober 2003. Dit moet beklemtoon word dat die kandidate onder die jurisdiksie van die skool bly totdat die eksamen op 21 November 2003 eindig.
7. DASS-prosedures
7.1 Leerderprofiele en portefeuljes moet beskikbaar wees vir moderering en progressie deur die OBOS-multifunksionele spanne aan die einde van die skooljaar.
7.2 Bewyse van assessering en die verslaghouding daarvan is die deurslaggewende faktore wanneer besluite ten opsigte van leerderprogressie aan die einde van die jaar geneem word.
7.3 Alle rolspelers moet die belangrikheid besef van geverifieerde, bygewerkte profiele en portefeuljes aangesien dit 'n beeld gee van die leerder se vordering deur die jaar.
8. Leerderveiligheid aan die einde van die jaar
8.1 Elke leerder se veiligheid is ten alle tye van die uiterste belang. Skole word versoek om veiligheidsmaatreëls as 'n prioriteit met alle personeellede te bespreek wanneer die beplanning vir die einde van die jaar gedoen word.
8.2 Ouers en die skoolbeheerliggaam moet skriftelik in kennis gestel word van die reëlings vir die einde van die jaar en van die skool se veiligheidsplanne vir leerders.
8.3 Die rolle, verantwoordelikhede, besluite, reëls en moontlike gevolge indien daar nie vir leerderveiligheid beplan word nie, moet aan alle opvoeders, leerders en ander rolspelers verduidelik word.
8.4 Ouers moet in kennis gestel word van enige reëlings wat verander word en ook van enige leerders wat hulle nie hou by die reëlings waarop ooreengekom is nie.
8.5 Diensverskaffers van die gemeenskap, bv. verkeersbeamptes, die munisipale polisie, skoolvervoer en taxibestuurders, moet ingelig word oor die skool se planne vir die einde van die jaar sodat hulle, indien nodig, hulp kan verleen.
8.6 Riglyne moet vir jaareindfunksies voorsien word en al die aspekte van veiligheid en verantwoordelikheid moet onder die aandag van alle leerders gebring word.


GETEKEN: R.B. SWARTZ
HOOF: ONDERWYS
DATUM: 2003:08:18