1. Gesamentlike Ooreenkoms 3/2002, wat in verband staan met die Prestasiebestuurs- en ontwikkelingskema vir kantoorgebaseerde opvoeders, is op 11 Desember 2002 deur die werkgewer- en werknemerpartye in die Raad op Arbeidsverhoudinge in die Onderwys onderteken. Die ooreenkoms vorm die basis van die prestasie-evalueringstelsel wat gebruik sal word vir die assessering van die prestasie van alle kantoorgebaseerde opvoeders en die salarisprogressie gekoppel aan die uitkoms van die evaluering. Die huidige siklus sal op 31 Maart 2004 ten einde loop en die resultate sal van April tot Junie 2004 verwerk word met die oog op die salarisprogressie (kerfaanpassing) op 1 Julie 2004.
2. Ingevolge die ooreenkoms sal alle betrokke personeel vanaf Julie 2003 opgelei word in die implementering van die stelsel. Die opleidingsmateriaal sal die kriteria en instrumente van die skema bevat en besonderhede van die program sal binnekort uitgestuur word. Meer omvattende inligting oor die salarisprogressieskale sal in 'n aparte omsendbrief voorsien word.
3. Vanjaar sal alle kantoorgebaseerde opvoeders se salarisprogressie (kerfaanpassing) nog automaties op 1 Julie 2003 plaasvind, maar vanaf 1 Julie 2004 sal dit op die assessering van prestasie gebaseer wees.
4. Bring asseblief die inhoud van hierdie omsendbrief onder die aandag van alle betrokkenes.


GETEKEN: G.J. ELLIOTT
HOOF: ONDERWYS
DATUM: 2003:07:08