1. Agtergrond

Die Suid-Afrikaanse Nasionale Geletterdheidsinisiatief (SANGI), wat voorsiening maak vir pre-VBOO en VBOO Vlak 1-leerders, vorm deel van die Tirisano-program wat deur die Minister van Onderwys geïnisieer is. Die veldtog word deur die Nasionale Departement van Onderwys gekoördineer, in 'n vennootskap met UNISA. Die projekbestuurder in die Wes-Kaap Onderwysdepartement (WKOD) is mnr. André Damon.

2. Implementering van die inisiatief
2.1 Die veldtog word deur vrywilligers behartig, wat elkeen 'n honorarium sal ontvang.
2.2 Vir so lank as wat die veldtog duur, moet alle VBOO Vlak 1-leerders as SANGI-leerders ingeskryf word.

Alhoewel dit vir opvoeders wat tans by GLS'e in diens geneem is om op Vlak 1 onderrig te gee, in orde sou wees om bykomende groepe op 'n vrywillige basis te aanvaar, moet hul indiensnemingstatus by die GLS nie gewysig word alvorens hul kontrakte verstryk het nie. Daarna sal daar weer oor hul kontrakte onderhandel kan word, met inagneming van die honorarium wat van SANGI ontvang is.
2.3 Steun vir die betrokkenes geskied op twee vlakke:

  • Elke groep van 8 vrywillige opvoeders word deur 'n vrywillige monitor gemoniteer en ondersteun;

  • Elke groep van 8 monitors word deur 'n vrywillige koördineerder gemoniteer en ondersteun.
2.4 Let daarop dat SANGI-monitors aan SANGI-koördineerders rapporteer, en nie aan hul sentrumbestuurders nie. Derhalwe behoort SANGI-monitors en SANGI-koördineerders gereeld in groepe te ontmoet. Die sentrumbestuurders en SANGI-koördineerders moet die aantal en frekwensie van hierdie vergaderings bepaal.
2.5 Sentrumbestuurders moet SANGI-leerplekke wat naby aan hul GLS'e geleë is en wat nie geregistreer is nie, help om by die WKOD te registreer ten einde die oorgang van leerders na die VBOO Vlak 2 te fasiliteer.
2.6 GLS'e moet 'n plasingstoets toepas op elke leerder wat vir die VBOO Vlak 2 wil inskryf.

3. Kurrikulum en Leerondersteuningsmateriaal (LOM) vir SANGI
3.1 Die kurrikulum van die inisiatief is gebaseer op die Eenheidstandaarde vir Taal, Geletterdheid en Kommunikasie (TGK), en vir Wiskunde, Wiskundige Geletterdheid en Wsikundige Wetenskap (WWGWW) van die VBOO Vlak 1. Leerders het derhalwe toegang tot primêre en bykomstige tale, en gesyferdheid. Toevoegings tot die kurrikulum is VIGS-opvoeding, Entrepreneurskap, en Kieseropvoeding. Die vordering van leerders word deurlopend geassesseer, en meganismes is daargestel om die betroubaarheid van bevindinge te verseker.

Die LOM wat gebruik word, sluit materiaal in wat deur Operation Upgrade, ABE Services en Project Literacy ontwikkel is. Die materiaal vir VIGS en Entrepreneurskap is deur UNISA ontwikkel, en die boekies vir Kiesersopvoeding deur die Onafhanklike Verkiesingskomitee. Al die LOM word deur UNISA voorsien.


Ek wil alle gemeenskapsleersentrums aanspoor om aan hierdie inisiatief deel te neem en dit te steun.



GETEKEN: P.A. VINJEVOLD
HOOF: ONDERWYS
DATUM: 2003:06:25