1. Weens die talryke navrae na die implementering van die beleid rakende die betaling van waarnemingstoelae vir personeel op salarisvlakke 1 tot 12, het die Minister van Staatsdiens en Administrasie die volgende verdere beslissings gemaak wat vanaf 1 April 2002 (datum van implementering van die waarnemingstoelaebeleid) van krag is:
1.1 ‘n Maksimum van twee werknemers kan die waarnemingstoelae proporsioneel ontvang indien hulle aangestel word om waar te neem in ‘n enkele hoër vakante befondsde pos, op voorwaarde dat

  • die verantwoordelikhede verbonde aan die hoër vakante befondsde pos tussen die twee werknemers wat in sodanige pos waarneem, verdeel word, en in die vorm van ‘n verhouding (bv. 30/70%) uitgedruk is voordat hulle aangestel word om in sodanige hoër vakante befondsde pos waar te neem.

  • die maksimum (gekombineerde) waarnemingstoelae wat aan die twee werknemers betaal kan word die verskil tussen die salariskerf van die laagste gegradeerde werknemer en die aanvangsalaris van die hoër vakante befondsde pos is. (Dit beteken dat die uitgawe nie oorskry mag word indien slegs die laagste gegradeerde werknemer in ’n waarnemende hoedanigheid in die hoër vakante befondsde pos aangestel sou word nie.)

  • die werknemers se individuele waarnemingstoelae proporsioneel tot die bogemelde verhouding bepaal moet word. (Dit beteken dat indien die verdeling van verantwoordelikhede tussen die twee werknemers 30/70% is, een werknemer vir 30% en die ander werknemer vir 70% van die maksimum (gekombineerde) waarnemingstoelae sal kwalifiseer.)
1.2 Indien ‘n werknemer op 'n salariskerf (wat 'n persoonlike kerf insluit) is wat hoër is as die aanvangsalaris van die hoër vakante befondsde pos waarin hy of sy aangestel is, sal die waarnemingstoelae die verskil wees tussen die huidige salariskerf en die volgende hoër salariskerf van toepassing op die hoër vakante befondsde pos, op voorwaarde dat daar 'n verskil is. Indien die hoër befondsde vakante pos 'n SBD-pos is, is die verskil tussen die huidige salariskerf en 60% van die inklusiewe buigsame besoldigingspakket betaalbaar, op voorwaarde dat daar ‘n verskil is.
1.3 Indien die betaling van die waarnemingstoelae ‘n aanvang neem na die eerste dag of eindig voor die laaste dag van ‘n maand, word die daaglikse tarief bereken deur die jaarlikse bedrag deur 12 (aantal maande per jaar) en daarna deur die aantal kalenderdae vir die spesifieke maand te deel.

2. Hierdie omsendbrief moet saamgelees word met Omsendbrief 0103/2002 van 20 Augustus 2002 en die inhoud daarvan moet asseblief onder die aandag van alle werknemers gebring word


GETEKEN: G.J. ELLIOTT
HOOF: ONDERWYS
DATUM: 2003:06:17