1. Dit het onder die aandag van die departement gekom dat heelwat lynbestuurders (insluitende hoofde van opvoedkundige inrigtings) nog nie posbeskrywings vir staatsdienspersoneel onder hul beheer opgestel het nie (verwys na Omsendbrief 82/2002 van 11 Julie 2002).
2. Weens die swak reaksie rakende die indien van die sertifikate vir voltooiing deur bestuurders (kyk Aanhangsel A van Omsendbrief 82/2002), en met inagneming van die paar aanvaarbare redes vir nie-indiening wat ontvang is, is besluit om die sperdatum vir die indiening van die sertifikate na 27 Junie 2003 uit te stel.
3. Uit navrae en vertoë van verskeie rolspelers insluitende personeelverenigings, is dit duidelik dat sommige personeellede nie goed ingelig is oor die konsep van posbeskrywings nie.
4. Dit moet dus beklemtoon word dat alhoewel die opstel van posbeskrywings die verantwoordelikheid van die lynbestuurder is, hierdie dokumente opgestel moet word in oorleg met sy ondergeskikte personeellede. Lynbestuurders moet dus toesien dat hulle ondergeskiktes bewus is van die prosesse verbonde aan die opstel van posbeskrywings. .
5. Die Hulpdiens, waar vrae gestel en beantwoord kan word, wat met die daarsteling van die proses deur die WKOD ingestel is, word steeds bedryf om u te ondersteun. Alle amptenare word ook versoek om die inhoud van die prosedurehandleiding oor posbeskrywings vir staatsdienspersoneel te bestudeer. Die aangehegte Bylae B, “Vrae wat dikwels gevra word...”, poog om sommige vrae wat geopper is te beantwoord. Die antwoorde wat verstrek word, neem egter nie die unieke omstandighede by sekere opvoedkundige inrigtings in ag nie. Persoonlike ondersteuning en leiding deur personeel van die Direktoraat: Personeelbestuur (Staatsdiens) sal, met inagneming van finansiële en ander beperkinge, op versoek oorweeg word .
6. Die voltooide Sertifikaat (Aanhangsel A), moet gestuur word aan die Posbeskrywingsbeampte, mnr E Gierdien, om die WKOD nie later nie as 27 Junie 2003 te bereik. Die WKOD vertrou dat ‘n doelbewuste poging aangewend sal word om posbeskrywings op te stel of om bestaande posbeskrywings vir alle staatsdienspersoneel te hersien.
7. Hoofde van opvoedkundige inrigtings en direkteure moet bevestig dat alle posbeskrywings binne hulle onderskeie inrigtings of direktorate volgens die goedgekeurde formaat opgestel is.
8. Bring asseblief die inhoud van hierdie omsendbrief onder die aandag van alle staatsdienspersoneellede onder u beheer.
9. Navrae kan aan die volgende beamptes gerig word: 
Me  LP Bovana          Telefoon  021 467 2471       
Me  GM Malan           Telefoon  021 467 2155
Mnr E Gierdien         Telefoon  021 467 2157


GETEKEN: J.H. HURTER
HOOF: ONDERWYS
DATUM: 2003:05:28

Aanhangsel A: Sertifikaat van voltooiing  (grootte: 11 KB)
Aanhangsel B: Vrae wat dikwels gevra word  (grootte: 16 KB)