1. Die Wes-Kaap Onderwysdepartement sal die volgende kriteria toepas in die oorweging van die skep van addisionele opvoederposte as gevolg van ‘n toename in die leerdertal vir 2003 en om in die kurrikulumbehoeftes van skole te voorsien.
1.1 GROEI IN LEERDERTAL
1.1.1 Aansoeke om addisionele poste sal slegs oorweeg word aan die hand van die leerdertal op die tiende skooldag van 2003.
1.1.2 Sodanige leerderinskrywing moet deur die kringbestuurder geverifieer wees by wyse van ‘n fisiese koppe-telling van die skool se totale leerdertal.
1.1.3 In die aansoek moet die prinsipaal bevestig dat voldoende geskikte akkommodasie vir die addisionele opvoeders beskikbaar is.
1.1.4 Addisionele poste mag slegs ten opsigte van dubbelskofklasse (platooning) oorweeg word indien die implementering daarvan vooraf deur die verantwoordelike Hoofdirekteur goedgekeur is.
1.1.5 TDie toekenning van addisionele poste (en plaasvervangers) sal nie oorweeg word as ‘n skool oor botallige opvoeders beskik nie, d.w.s. waar die skool reeds meer permanent aangestelde opvoeders het as waarvoor die diensstaat voorsiening maak.
1.1.6 Addisionele poste sal oorweeg word volgens verdienste, met spesiale klem op die aantal leerders waarmee die skool se leerderinskrywing gestyg het, en in sommige gevalle kan die globale bedeling van 35:1 (sekondêre skole) en 40:1 (primêre skole) in berekening gebring word.
1.1.7 Ten spyte van die maatreël in paragraaf 1.1.6, kan dit nie bloot aanvaar word dat ‘n skool met ‘n globale bedeling van 35:1 (sekondêre skole) en 40:1 (primêre skole) in aanmerking sal kom vir addisionele poste nie.
1.1.8 Die kringbestuurder se aanbeveling met betrekking tot die aansoek en sy of haar gesertifiseerde verklaring rakende die koppe-telling moet die aansoek vergesel.
1.2 KURRIKULUMBEHOEFTES
1.2.1 Aansoeke om addisionele poste moet ten volle gemotiveer wees.
1.2.2 Die skool se volledige rooster moet die aansoek vergesel.
1.2.3 Die kwalifikasies, veral die hoofvakke, van alle opvoeders (permanente sowel as kontrakopvoeders) moet voorsien word en daar moet ook aangedui word waarom die huidige opvoeders nie die vak(ke) waarvoor addisionele opvoeders benodig word, kan aanbied nie.
1.2.4 Kringbestuurders moet verseker dat daar geen botallige opvoeders in hulle of naburige kringe is wie se dienste moontlik in die behoefte van die betrokke skool kan voorsien nie. Indien so ‘n opvoeder geïdentifiseer word, moet die departement in kennis gestel word en kan die botallige opvoeder met sy of haar instemming toegewys word aan die skool waar die behoefte bestaan.
2. Aangesien aansoeke wat nie aan die bostaande vereistes voldoen nie, nie oorweeg kan word nie, moet prinsipale verseker dat al die relevante inligting ingedien word.
3. Onder geen omstandighede mag ‘n prinsipaal ‘n opvoeder aanstel sonder dat die addisionele pos amptelik deur die departement goedgekeur is nie. In die geval van ‘n ongemagtigde aanstelling sal enige vrugtelose uitgawe of salaris van die betrokke prinsipaal se salaris verhaal word.
4. Aansoeke om addisionele poste moet gemerk word vir aandag mnr D Flandorp (Direktoraat Personeelbestuur: Opvoeders) Kamer 9-34.

U samewerking sal waardeer word.


GETEKEN: J.H. HURTER
HOOF: ONDERWYS
DATUM: 2003:01:16