1. INLEIDING
1.1 Op ‘n vergadering van die hoofde van die nasionale en provinsiale onderwysdepartemente op 18 Maart 2003 is besluit om die nasionale Graad 9- bevorderingsvereistes van 2002 in 2003 te behou.
1.2 In grade R tot 8 is die stelsel van vordering met die ouderdomsgroep van toepassing.
1.3 Die bevorderingsvereistes vir graad 9 en die stelsel van vordering in grade R - 8 word in die volgende afdelings verduidelik:

2. GRAAD 9
2.1 Bevorderingsvereistes

  • Graad 9 is die einde van die Algemene-onderwys-en-opleidingsband.

  • ‘n Stelsel van bevordering is van toepassing op hierdie punt.

  • Daar word beoog dat vir elke leerarea, 75% van die bevorderingspunt op skoolgebaseerde assessering (deurlopende assessering) en 25% op eksterne assessering (gemeenskaplike taak vir assessering) gebaseer sal word.

  • Alle graad 9-leerders aan alle skole in die Provinsie moet in al die leerareas die gemeenskaplike take vir assessering, wat op nasionale vlak opgestel word, voltooi.

  • Ten einde na graad 10 bevorder te word, moet ‘n leerder aan die volgende vereistes voldoen:

    Minstens ’n “Bereik”-beoordeling (kode 3) moet in Taal, Geletterdheid en Kommunikasie (TGK) en in Wiskundige Geletterdheid, Wiskunde en Wiskundige Wetenskappe (WGWWW) behaal word

    EN

    minstens ’n “Gedeeltelik bereik”-beoordeling (kode 2) moet in elk van die oorblywende ses leerareas behaal word.

  • Die persentasies wat verband hou met die optekening en rapportering van vlakbeskrywerkodes is soos volg:

VLAKKODEVLAKBESKRYWERPERSENTASIE
1 Nie bereik nie 0% tot 34%
2 Gedeeltelik bereik 35% tot 39%
3 Bereik 40% tot 69%
4 Uitstaande / uitmuntende prestasie 70% en meer
2.2 Kondonerings

Die volgende kondonerings geld vir graad 9 in 2003:

‘n Leerder sal gekondoneer word indien hy of sy ‘n “Bereik”-beoordeling (kode 3) behaal het in óf Taal, Geletterdheid en Kommunikasie (TGK) óf Wiskundige Geletterdheid, Wiskunde en Wiskundige Wetenskappe (WGWWW) en ten minste ’n “Gedeeltelik bereik”-beoordeling (kode 2) in die ander een van hierdie twee leerareas behaal het

EN

ten minste ’n “Gedeeltelik bereik” -beoordeling (kode 2) in vier van die oorblywende ses leerareas behaal het.

L.W.Dit is moontlik vir ’n leerder om gekondoneer te word selfs indien sy of hy ’n “Nie bereik nie”-beoordeling (kode 1) in twee van die oorblywende ses leerareas behaal het.
2.3 Konsessies

Die volgende konsessies is van toepassing:

  • Leerders wat leerstoornisse ondervindg

    Leerders wat leerstoornisse ondervind in gewone en gespesialiseerde skole sal geakkommodeer word deur aanpassings van die kurrikulum, vrystelling van sekere vereistes, en aanpassings aan die assesseringsvorme wat gebruik word. Konsessies sal op versoeke van die betrokke skole gebaseer word. Hierdie versoeke moet, met bewyse van intervensie, aan die kringbestuurder vir oorweging gerig word. Die skool moet die redes verskaf vir die mate waartoe die leerstoornisse ’n konsessie vereis. Konsessies sal op OBOS-vlak toegeken word.

  • Dowe leerders

    Dowe leerders word vrygestel van die vereiste om in twee amptelike tale te slaag, maar moet ten minste een amptelike taal aanbied. Dieselfde kondonerings soos in paragraaf 2.2 is van toepassing.

  • Immigrante

    Immigranteleerders wat nie langer as 3 jaar in die land is nie (d.w.s. ’n skool in Suid-Afrika begin bywoon het ná Januarie 2001) sal vrygestel word van die vereiste om in twee amptelike tale te slaag. Hierdie leerders moet ten minste een amptelike taal aanbied. Dieselfde kondonerings as in paragraaf 3 is van toepassing.

    		•
    3. VORDERING IN GRADE R TOT 8
    3.1 Volgens die nasionale Assesseringsbeleid (Staatskoerant 19640, 23 Desember 1998) is ‘n stelsel van vordering met die ouderdomsgroep van toepassing in hierdie grade.
    3.2 “Ouderdomsgroep” verwys na leerders wat in dieselfde jaar begin skoolgaan het of van min of meer dieselfde ouderdom is.
    3.3 Ooreenkomstig assesseringsbeleid beteken “vordering” nie dat die leerder elke jaar na die volgende graad deurgedruk word nie. Dit beteken dat die leerder dwarsdeur die jaar na die bereiking van uitkomste vorder, op die vlak van toepassing op ‘n graad. Die opvoeder, leerder en ouer moet tesame verseker dat sodanige vordering dwarsdeur die jaar plaasvind. Leerders en ouers moet vroegtydig in kennis gestel word dat die leerder nie genoegsame vordering maak nie.
    3.4 Die doel van assessering is om bewyse van bereiking op ‘n deurlopende basis bymekaar te maak. Indien die leerder nie bewyse van bereiking produseer nie, word die kwessie van ondersteuning kritiek ten einde die bereiking van uitkomste op die toepaslike vlak te verseker.
    3.5 Die WKOD is van voorneme om binnekort ‘n basiese en verbruikersvriendelike riglyn, wat tegnieke vir ondersteuning deur opvoeders insluit, uit te reik ten einde opvoeders in staat te stel om basiese ondersteuning aan leerders te gee.

    4. ALGEMEEN
    4.1 Bring asseblief die inhoud van hierdie omsendbrief onder die aandag van alle belanghebbendes, insluitende opvoeders, ouers en leerders.
    4.2 Navrae oor die inhoud van hierdie omsendbrief mag aan OBOS-direkteure en Hoofkurrikulumadviseurs gerig word.


    GETEKEN: P.A. VINJEVOLD
    HOOF: ONDERWYS
    DATUM: 2003:05:07