1. Dit het onder die aandag van die Wes-Kaap Onderwysdepartement (WKOD) gekom dat sekere prinsipale en hulle skoolbeheerliggame (SBL’e) die uitslae en/of die sertifikate van sommige van hulle Senior Sertifikaat-eksamenkandidate terughou en weier om getuigskrifte aan sekere kandidate uit te reik vanweë uitstaande gelde of om ander redes.
2. Die WKOD wil dit graag bevestig dat prinsipale wat op enige manier betrokke raak by aktiwiteite wat die toekoms van hulle kandidate kan benadeel en in gebreke bly om die uitslae aan al hulle kandidate vry te stel en om seker te maak dat alle suksesvolle kandidate hulle sertifikate ontvang, se optrede strydig is met die bepalings van die SA Skolewet (1999) en die Nasionale beleid aangaande die afneem van die Senior Sertifikaat-eksamen (1999).
3. Die Senior Sertifikaat-eksamen is ‘n openbare eksamen en, aangesien die Departement die eksamen en die sertifikaat gratis aan kandidate aanbied, mag geen openbare of onafhanklike onderwysinrigting kandidate die reg ontsê om die eksamen af te lê nie. Hulle mag ook nie eksamenuitslae of -sertifikate teruggehou nie.
4. Skole moet ander metodes gebruik om uitstaande gelde van hulle leerders te verhaal. Ingevolge die Skolewet word skole toegelaat om onbetaalde gelde te verhaal deur regstappe teen ‘n leerder se ouer(s) te doen.
5. Dit het ook onder die aandag van die WKOD gekom dat sekere skole soms op grond van dissiplinêre probleme kandidate verhinder om die Senior Sertifikaat-eksamen af te lê. Dit is onwettig om kandidate te verhinder om die Senior Sertifikaat-eksamen af te lê op grond daarvan dat hulle die skoolreëls verbreek het.
6. Kandidate wat hulle skuldig maak aan enige ernstige wangedrag tydens die tydperk vanaf hulle laaste skooldag tot hulle eerste eksamen of tydens die eksamentydperk, moet aan die Onderwyshoof gerapporteer word sodat daar op toepaslike wyse teen hulle opgetree kan word.
7. Prinsipale en hulle SBL’e moet daarop let dat die Departement verbind is tot die beskerming van die reg van kandidate om enige openbare eksamen af te lê en hulle uitslae en/of resultate te ontvang.


GETEKEN: P.A. VINJEVOLD
HOOF: ONDERWYS
DATUM: 2003:05:07