1. Die administrasie van aansoeke om leerdervervoerdienste (LVD’s) het 'n bron van bekommernis geword, aangesien projeksies aandui dat die behoefte aan leerdervervoerdienste (LVS) in die provinsie toeneem, soveel so dat die beskikbare begroting oorskry word. Die volgende prosedures en beheermaatreëls sal met ingang van die 3de skoolkwartaal 2012 geld wanneer aansoeke voltooi word.

2. 'n Volledig gemotiveerde aansoek om leerdervervoer moet voltooi en via die onderwysdistrikskantoor by die Hoofkantoor ingedien word teen die keerdatums by paragraaf 4 om te verseker dat aansoeke betyds goedgekeur en geïmplementeer word. Die goedkeuring van aansoeke is onderhewig aan die beskikbaarheid van fondse. Vooraf goedkeuring moet vanaf Hoofkantoor verkry word voordat addisionele leerders op 'n roete vervoer word. Kontrakteurs sal nie vergoed word vir leerders wat sonder vooraf toestemming vervoer word nie.

3. Nuwe roetes moet aan die begin van 'n skooljaar ingestel word, derhalwe die versoek dat aansoeke om die instel van 'n nuwe vervoerskema as volg ingedien word. Skole moet die maand van Augustus 2012 aanwend om 'n volledig gemotiveerde aansoek te voltooi en dit teen 31 Augustus 2012 aan die Onderwysdistrikskantoor voorsien. Die Onderwysdistrikskantoor moet die maand van September 2012 gebruik om 'n roetekaart en roetespesifikasies voor te berei sodat 'n volledig gemotiveerde aansoek aan Hoofkantoor voorsien kan word teen 30 September 2012.

4. Gewone openbare skole moet alle aansoeke vir LVD’s vir die 2013 akademiese jaar, ten minste een maand vroeër as die datums hieronder aangedui, by hulle onderwysdistrik voorlê, vir die aandag van die Adjunkdirekteur: Korporatiewe Dienste. Die onderwysdistrikte sal dan toesien dat alle aansoeke by die Hoofdirekteur: Distrikte (Vir aandag: Mnr R Larney) ingedien word teen die datums soos hieronder aangedui.

KWARTAAL BEGIN VAN KWARTAAL KEERDATUM VIR AANSOEKE BY HOOFKANTOOR
1 16 Januarie 2013 30 September 2012
2 8 April 2013 1 Maart 2013
3 15 Julie 2013 3 Junie 2013
4 1 Oktober 2013 Geen nuwe leerders sal met ingang van die vierde skoolkwartaal op leerder- vervoerskemas toegelaat word nie.

5. Nadat 'n aansoek by die Hoofkantoor oorweeg is, sal die Hoofdirekteur: Distrikte van die uitslag verwittig word, wat dan alle rolspelers van die uitslag moet verwittig.

6. Die volgende maatreëls sal met ingang van die begin van die 3de skoolkwartaal 2012 geïmplementeer word:

  • Vooraf goedkeuring moet vanaf Hoofkantoor verkry word voordat enige addisionele leerders op 'n roete vervoer mag word. Kontrakteurs sal nie vergoed word vir enige leerders wat op 'n ongemagtigde grondslag vervoer word nie.

  • Die insluiting van addisionele leerders en/of die uitbreiding van bestaande roetes sal met ingang van 'n lopende datum goedgekeur word. Hierdie datum sal wees die begin van die maand wat volg op die datum waarop aansoeke ontvang word. Geen terugwerkende goedkeurings sal derhalwe toegestaan word nie.

  • Geen nuwe roetes sal ingestel word met ingang van die vierde skoolkwartaal nie.

  • Distrikskantore word versoek om ondersoek in te stel of die leerders nie by ander skole, binne die 5 kilometer radius van hul wonings, ingeskryf kan word nie, alvorens oorweging daaraan geskenk word om hulle op 'n leerdervervoerskema in te sluit.

  • Die WKOD se LVD-beleid bepaal dat die volgende areas nie vir leerdervervoer kwalifiseer nie:

    • Dorpe in plattelandse distrikte waar openbare vervoer geredelik beskikbaar is en voldoende klaskamerruimte of 'n geskikte skool beskikbaar is.
    • Gebiede wat geleë is in die Kaapstad Metropool waar openbare vervoer geredelik beskikbaar is.

    Distrikskantore word versoek om ondersoek in te stel na watter roetes ingekort,uitgefaseer of beëindig kan word waar die nodige infrastruktuur bestaan.

  • Aansoeke wat laat ingedien word, sal nie oorweeg word nie, tensy dit vergesel word van 'n aanvaarbare skriftelike verduideliking.
7. Dit sal waardeer word indien die riglyne vervat in hierdie omsendminuut streng nagevolg kan word.


GETEKEN: PA VINJEVOLD
HOOF: ONDERWYS
DATUM: 2012:06:20